JEREMIAH 15 - Kathara Bible (BSI)

Judah Mibingwui Kashimān

¹ Chiwui thili Prohona ili hānga, “Moses eina Samuelna iwui mangāli nganinglala, iwui wuklung mibing hili mangareiungluimara. Iwui maiyan eina kashamhaolu, kala athumli thui ngasakhaolu.

² Kala athumna ‘Ithum kali vaurakhala?’ da khangahān tharan, nana athumli hithāda hānglu, Prohona hithāda hānga: Kazātwui vang kazātli, kala raighaiwui vang raighaili, chāmreiwui vang chāmreili, narhaoki kajibingna narkahaili vāra.’”

³ Athumli sāshimān khavai ina apong mati ngarānra, da Prohona hānga: raighaina shātthatra, fana sheikasākra, kala yongkazat vānao kala ramsāna shaida sashimānra.

⁴ Kala Hezekiahwui naomayara, Judahwui awunga Manassehna Jerusalemli kasāsā chiwui vang, okathuiwui wungram saikorali khangachee sāmira.”

⁵ “O Jerusalem, nali khipāna lumashanmirakhala, lah khipāna nali chapngachāmirakhala? Kkhipana kathāhaokhala da rāngahānmirakhala?

⁶ Nathumna ili makhuisangmana, yāmkhangai yāma da Prohona hānga, chiwui vang nali mamayāmada ipāng katingshokta nali shimān khangasakna;— Ina yangmisānhaira.

⁷ Hamkhavai yāmkok eina ina ngalei chiwui ngaveilungli hamserhaira; iwui mibingli shimān ngasakta sifa khangasakna; athumna athumwui apongwui eina mahanungmana.

⁸ Yireiwui situile; ina athumwui ra̱meiva̱bing chungmei ngasakhaira; yaronnaobing yaronshaplakha chithitra, ava̱va̱ ngarāli khanang ngasakra. Khangachee-khangachā kashuirak eina ina athumwuitungli tāngasakra.

⁹ Nao shini kapharāva̱ ning thengchanghaida vānhaira; ngashunung awui zimik tunhaowa; ali maishida khayak ngasakhaira. Kataibing chili yangkashibingwui mangāli raighai eina chithitra da Prohona hānga.”

Jeremiahna Proho li Tuikat Kasa

¹⁰ Ngalei katongali khangahei kala khanganura ili kapharava̱ ishāva̱, kalākashi! Ina khipālikha mashukmana, kachishutla maleimana, chithālala saikorana ili khonshiya.

¹¹ Chithakhalairanu; O Proho, mibingwui phākhavaiwui vang ina nali maphayatmisāsi kaja, kala yangkashe athumwui mathun eina ina nali kakhanang atamli kala sikafa atamli maphayatmisāsi kajiva!

¹² Atungshongwui mari, pithrai khamanāta mari chi sā̱tekashapa mi leirala?

¹³ “Nathumwui moreiwui vang eina, nathumwui ramkhai ungpei vāpeida nathumwui lan kala kazip kahai saikora yangkashibingli aman makhuila ngaponkhui khavai mihaora.

¹⁴ Nathumna makathei ngaleili ina nathumli yangkashibingwui otram ngatha̱ ngasakra; kaja, iwui malungkathui mamitlakki kaji mei thada chuikāhaira.”

Jeremiahli Chānkachang Kahāng

¹⁵ “O Proho, nana katheina; ili phaningungda ngachonmilu, kala ili rekakharekbingli iwui vang athut khuimilu. Nana khāngkatheiwui alungli ili makhuithuimilu; namingwui vang ina miwui malungkhavāt samkaphangna kaji katheimilu.

¹⁶ Nawui tui chi samphangda ina chibing chi zai, kala nawui tui chi iwui vang khamathān kala wuklungwui ringkaphā ngasahaowa; kaja naming eina ili hoi, O Proho, saikorawui Vare.

¹⁷ Ina lumlao kasābingli mangayurpamana, khamathānla ina mamathānmana; nawui kahāng nganāda imāng pama, kaja nana ili malungkathuina chipemmi.

¹⁸ Iwui kachot khisāda mangasāmthu, iwui maraikapai khamā khisāda maraimithu? Na ili thengkahai kongrā thārala?”

¹⁹ Chiwui vang Prohona hithāda hānga: “Nana latungakha ina nali khuisangmira, kala iwui mangāli nana nganingra. Makānkhanā tui horhaida kasaka tui matuiakha, nana iwui khamor ngasāra. Athumna nali ngareiungra, kha nana athumli mangareivāmara.

²⁰ Mibing hili khangazip pithraiwui phākho ngasā khavai ina nali sākhuira; athumna nali ngasungra, kha athumna nali mayuirarmara, kaja nali kanshokta huimi khavai ina nali ngasomida lei, da Prohona hānga.

²¹ Makhayābingwui pāng eina ina nali kanmira, sakashebingwui eina nali ngatangkhuimira.”