JEREMIAH 13 - Kathara Bible (BSI)

Tawon Malao

¹ Prohona ili hithāda hānga, “Vālu, tāwon malao akha lokhuilaga nakashānli ngavailu, kha tara̱li maruralu.”

² Chieina Prohowui kakaso athishurda ina malao akha lokhuilaga ngavaiya.

³ Kakhaneli Prohowui tui chi ili rāhāngluishita,

⁴ “Nana lokakhui kashānli khangavai malao chi khuilu, kala ngakarthuida Euphrates kongwui lunghārkhur akhali athumhaolu.”

⁵ Chieina Prohowui kakaso athishurda ina Euphrates kongpheili vāda athumhai.

⁶ Kala zimiksho sha̱rakhawui thili Prohona ili hānga, “Ngakarthuida Euphratesli vālu, laga ina kakaso athishurda nana thumkahai malao chi akhuilu.”

⁷ Chieina Euphratesli vālaga ina thumkahai apam chiwui eina malao chi akhui. Kala yanglu, malao chi zakshihairasai; chi khikha masāvaithuwa.

⁸ Chieina Prohowui tuina ili rāhānga:

⁹ “Prohona hithāda hānga: Judahwui langkaso kala Jerusalemwui mahāngkharar langkaso chi ina hi tākam eina zakshi ngasakra.

¹⁰ Makaphā mibing, iwui tui makhuisang khangaibing athumwui ningkachāngmāngli ngakaishitingting shurzatta vare kateibingli shitsangda khokharumbing athum khikha masā khavai malao hikathā ngasāhaora.

¹¹ Kaja mi akhawui kashānli malao ngavaikashān thāda Judahshi shimkhur eina Israelshi shimkhur ili ngavapshān ngasaka, da Prohona hānga. Kaja athumna iwui vang yur akha sāda, iwui ming, masot, kala tekmatei khavaiwui vangna, kha athumna manganāsangmana.”

Zamsham Ham

¹² Nana tui hi athumli vāhāngra: Israelwui Proho Varena hānga, “Ngankhā kachiva̱ drakhāra̱ chipem ngasakra. Kala athumna nali, ngankhā kachiva̱ drakhāra̱na pemserra kaji ithum matheikachangkhatmana da phaningla? da athumna nali hāngra.

¹³ Chieina nana athumli hāngra, Prohona hithāda hānga: Yanglu, ngalei hiwui mi saikorali, Davidwui wungpamli kapama awungabing chili, pāngmonbingli, marānbingli, kala Jerusalemli kapam saikoralila ina khamalip eina pemngasakra.

¹⁴ Kala ina athum akha eina akha ngashao ngasakra, avāva̱ ngarā eina anaomayarabing ngashao ngasakra da Prohona hānga. Ina athumli sākashimān tharan athumli kashākla mashākmimara, lukhamashanla malumashanmimara.”

Langkasoli Hāngkhamathin

¹⁵ Nganālu, nganākhuilu; malāngsoalu, kaja Prohona hānghaira.

¹⁶ Nathumwui Proho Vareli sochikatlu; ana tangkhamang makhuirāranglakha, māmāchākahai phungreibingli phei mangaphokranglakha; nathumna kahor phāzatlakha ana chi tangmang ngasakra kala tangmangting ngasakhaora.

¹⁷ Kha nathumna manganāsangakha, nathumwui lāngsotwui vang imanglāna ngathumda chapra; imikna chapchapta chara̱ pemda longtāra. Khikhalajila Prohowui yaoshang tukthuihaowa.

¹⁸ Awunga kala awungva̱li hānglu: “Khanempamli pamlu, kaja nathumwui khamathā kuihon nathum kuiwui eina tātunghaira.

¹⁹ Negebwui keinungbing shungnamhaira, shomi khavai mi khipākha malei; Judah saikora raithāhaira, katonga raithāserhaira.”

²⁰ Namik ngareikālu kala yanglu, atungshongwui eina kharābing chili. Nali mikahai nawui khamathā yaoshang kali vāhao?

²¹ Nathumwui ngasotnaona da nathumna tamkachithei athumna, nathumwuitungli mungakha nathum khi hāngra? Sha̱nao akhana naokhara̱ thāda kachotna nathumli makhanangmarala?

²² Khiwui vang ili hikathā ot rāshokhao? da nathumwui ningli phaningakha, nathumwui morei chungnā sākahaiwui vang, nathumwui kashan lānmi kahaina, kala kachotkachāng samkaphangna.

²³ Ethiopiawui mina awui ahui ngacheishapralā lah kuirāngna awui achuk ngacheishaprala? Chithākha nathum makaphā sākakasaibingnala kaphā sāshapra.

²⁴ Siwukwui masina lanji phankathui thāda ina nathumli chaiyāngmihaora.

²⁵ Hi nathumwui vang tamshokmi kahai yar china, da Prohona hānga; khikhalajila nathumna ili malaihaowa kala kakapikli shitsanga.

²⁶ I khalattana nathumwui kashan nathumwui mai eina tangda lānkāmira kala nawui khayā theingasakra.

²⁷ Nathumwui ningkakachai otsak ina theiserhaira, phokaphāla, khayor otsak, luili ngahongli khamathang kasāsā saikora! O Jerusalem, nali kakhanang ngasāranu! Na karankhawui thili tharnaonikhala?