JEREMIAH 12 - Kathara Bible (BSI)

Jeremiahna Proho li Khangahān

¹ Ina nali iwui makapen kahāng chitharanla, khamashung khangaronga chi nana O Proho, chithālala nawui mangāli iwui tuingaphun chi hāngphalungrali. Khiwui vang eina makhayābingna shāng-leihao? Khiwui vang eina ning makatharbingna reisanghao?

² Athumli nana lingsangda angayung sa̱khui; athumna reisang mamānda atheila mathei; nana athumli nganailak eina ngazeka, chithālala athumwui ninga katāva̱li lei.

³ Kha, nana ili katheina, O Proho, nana ili thei, kala nawui apongli ining tamyanga. Taithat khavai yaonao thāda athumli ngakhunshoklu, kala taithat khavai zimikshowui vang athumli ngateida hailu.

⁴ Ngalei hina karankha sifafara, kala luiwui khawona thengfara? Chili okthuida khaleibingwui makhayāwui vang sābing kala vānaobingla yāmserhaira; khikhalajila mibingna, “Ithumna kasā hi Varena matheimara” da hānga.

⁵ “Nana mili shongzā ngakhuilaga athumna nali tāpop ngasakhaikha, siguibingli kathāda ngakhuirarra? Kala ngalei khamasaili kongluiakha Jordanwui khararle kathāra?

⁶ Kaja nachinā ngarā kala nashāvāwui shimkhurwui mi eina tangda, athumna nali zakshilāk eina sāhaira; athumna nali mamayāmada makaphā panglāk eina sāda lei, athumna nali khamathā tui hānglala makhuisanglu.”

Proho na Awui Mibing wui vang Kakhanang

⁷ “Iwui mibingli ina horhaira, iwui shimlui ina chihochaohaira; Iwui ningna leishikhamataiabingli yangkashibingwui pāngli horsangmihaira.

⁸ Iwui shimluikat hi iwui vanga ngahongwui kazingkha̱ thāhaira, iwuitungli makhamayākhon vāoshoka; chiwui vang eina ina ali yangkharinga.

⁹ Iwui vang iwui shimluikat chukpoma sāshai vanao katha ngasahaola? Tukshaiki kaje vānao khangateibingna ali kuinamlaga leila? Vālu, ramsā saikora vākazipkhuilu; shaikhavai rāngasaklu.

¹⁰ Yaokahoma kachungkhana iwui drakhā yāmgui sākazammiserhaira, athumna iwui yar naithatmiserhaira; iwui khamathā yar chi athumna ramcho lamhāng ngasāmihaira.

¹¹ Athumna chi ramcho sāngasakhaowa; ramchohaoda ili ngakaoda lei. Ngalei katonga ramcho sāngasakhaira, kha khipānakha ningli sakta makhuimana.

¹² Siwukwui khangai kajuiya saikorawui pamli shimān khangasakbing rāhaira; kaja akatang ngalei akhawui eina akhali vāpeida Prohowui raighai eina sāthata; manglākapai khipākha chingri mahairarmana.

¹³ Athumna kehu lingsanga, ka̱shāt hātkhui; chotchānglak eina ot sai, kha tongkazā maleimana. Athum māhātwui vang khayakkha̱ sākhuira, khikhalajila athumli Prohona malungvāthaowa.”

Israelwui Khongnaili Proho wui Khangashit

¹⁴ “Ina iwui shimlui mathun khavai Israelli mikahai shimlui chi sākaza̱a iwui makaphā khongnai saikorawui pongli Prohona hithāda hānga: Yanglu, ina athumwui ngaleiwui eina athumli phurshokhaora, kala ina athumwui ngachaiwui eina Judahwui shimkhurli phurkhuira.

¹⁵ Kala athumli phurshok kahaiwui thili, ina athumli lumashanmiluida athum kachichāwui ngaleila kala shimluila ina hanmiserra.

¹⁶ Kala hithāda shokra, athumna iwui mibingwui apongbing chi ningmazinglak eina tamkhuiakha, imingli mingzaida, ‘Prohowui ming singda kahāngna,’ da athumna iwui mibingli Baalli mingkazai tamkachithei thāda saakha, iwui mibingwui ngachaili athumlila okthui ngasakra.

¹⁷ Kha kachikathā miyurna makhuisangakha ina phurshokchaohaida sākazamhaora da Prohona hānga.”