JEREMIAH 10 - Kathara Bible (BSI)

Kameoli Khokharum kala Khamashunga Khokharum

¹ O Israelwui shimkhur, Prohona nathumli kahāng tui chi nganālu.

² Prohona hithāda hānga: “Yur kateiwui acham masha̱khuialu, kala kazingramwui machut chili ningmasuitaalu, khikhalajila yurbingna chi theida ningsuitai,

³ kaja mibingwui ngashan chi khanguina. Ngahongwui thing akha ta̱tekhuilaga pāngthem kathemana ngahā eina sākhui.

⁴ Mibingna chili lupasā kala sinā eina heirora; mangatha̱ khavai athumna chi yāmkarnao eina yotpi shaoshāntithai.

⁵ Athumwui meoma̱bing chiya karopthei yāmguili hangkhāli samachit khavai thai, athuma mamatuirarmana; mazatrarmada mina phungzata. Athumli mangacheealu, kaja makaphā sākashap athumwuili maleimana, kaphā sakashapla athumwuili maleimana.”

⁶ O Proho, na kathā khipākha maleimana; nava hakkhamahāna, kala namingva pangshap leilaka.

⁷ Nali khipāna mangacheemarakhala, O yurbingwui awunga? Kaja hi nawui ngamna; kaja yur saikorawui thangkhamaingwui alunglila kala athumwui wungram saikorawui alunglila, nakathā maleilakmana.

⁸ Athumva mangkhama̱, kala wurkazomānga; meoma̱bingwui tamkachithei chiya khikha makhaning thingna!

⁹ Shaokhanankakhui lupasā chi Tarshishwui eina, kala Uphazwui eina sinā khuiunga. Athum chi pāngthem kathema kala sinā sākatheibingwui themsakna, athumwui sāri hungrisi mayingrisi kahaina; saikora chi them kathembingwui otsakna.

¹⁰ Kha Proho chi khamashunga Varelaka; a kharinga Varena kala makashimāna Awungana. A malungkathui tharan okathui nganuka, kala awui malungkhavāt chi yurbing maphungrarmana.

¹¹ Chieina nana athumli hithāda hāngra: “Kazingram eina ngalei makasā varebing chi okathuiwui eina kala kazingwui azingwui eina shimānhaora.”

Vareli Masotkhami Laa

¹² Pangshap eina okathui sākakhuia, awui thangmei eina apuk-apaga sakakā, kala awui theithangkhamei eina kazingram hārkashoka chi Ana.

¹³ Ana tui matuikashok tharan kazingramli tara̱ ngaphaokazama; kala okathui vākatangwui eina ana leijui ngasui ngasaka. Ana zingrot rotā khavaiwui vang rikhān ngashei ngasaka, kala ana awui kazip khavai shimwui eina masi phanrā ngasaka.

¹⁴ Mi kachiva̱ mangma̱haida theikhuikathei maleimana; sinā kasaa kachiva̱li awui meoma̱wui vang khayak ngasaka, kaja, awui ama̱bing chi makhamashungana, kala athumwuili khaksui maleimana.

¹⁵ Athum chi kānkhanā makhalei mangshong eina sākakhuina. athumli tandi khami atamli athum shimānhaora.

¹⁶ Jacobwui Vare chiya athum kathā maningmana, kaja ot saikora hi ana kasāna, awui shimlui ngasā khavai Israelli ana kapangkakhuina. Ashangva̱wui Proho chi awui mingna.

Raithāhaoki kaji

¹⁷ Nawui otrom ngaleiwui eina kazipkhuilu, O kuinam kahai alungli okathuibing!

¹⁸ Kaja Prohona hithāda hānga: “Yanglu, atam hili ina hiwui mibingli horshokhaora, kala athumli ina kakhanang hi khikhala kaji theikhavai kachotkachāng khuirāra.”

¹⁹ Ili saza̱ kahai hi I kalākashi! Iwui khamā marlakhaira. Kha ina hānga, “Kachangkhat eina hi kakhananglaka, Kala ina khāngphalungra.”

²⁰ Iwui kachonshimla sākachuphaira, iwui khara̱ saikorala sāshathaira; Inaongarā iwui eina thuiserhaida, matheithura; iwui kachonshim hārshoklui khavai, iwui shim sakāmi khavai khipākha maleithura.

²¹ Kaja yaokahomabing mangma̱ya, Proholi mangathingkhuimana; chiwui vang athum mamataikasangna, kala athumwui yaobing ngapha̱yāng kahaina.

²² Nganālu, chānkharop akha! Yanglu, chi rārāli! — hakkhamahā maphakakhui akhon atungshongwui eina, Judahwui keinungbing ngachakyāng eina ramfakhur ngasā ngasak khavaina.

²³ O Proho, ina thei, kaja miwui apong akhalattawuili maleimana, mikumowui pheikār karvāshum khavai akhalattawuili maleimana.

²⁴ O Proho, ili mashunwui alungli; mashungkhuimilu, nawui lungvāt eina maningla; maningkha nana ili makhaninga ngasā ngasakhaora.

²⁵ Nali makathei yurbingli, kala namingli makhangakao yurbingli, nawui malungkhavāt heishoklu; kaja, athumna Jacobli shaothathaira, ali shaothatta shaingakānhaira, kala awui pamkhavaila ramchomihaira.