JEREMIAH 1 - Kathara Bible (BSI)

¹ Benjaminwui ngalei Anathothli khalei pāngmon shimkhur Hilkiahwui naomayara Jeremiahwui tui,

² Judahwui awunga Amonwui naomayara Josiahna mungda tharāda kakathuma kum Prohowui eina kharā tuina.

³ Kala Judahwui awunga Josiahwui naomayara Jehoiakimna khamung atam eina thuida Judahwui awunga Josiahwui naomayara Zedekiahna mungda tharādakhare kum makupranglakha, kala kachāng kaphangāli Jerusalem matukkhuiranglakha rāhānga.

Jeremiahli Hokakhui

⁴ Prohowui tuina ili hithāda hānga,

⁵ “Naopamli ina nali masemranglakha nali ina theipinghairasai; kala na mapharāranglakha ina nali tharchikathairasai; yurbingwui marān akha ngasā khavai ina nali kapangsanghairasai.”

⁶ Chieina ina hānga, “Iyavo, Proho VARE! Yanglu, kathāda matuirakhala da I matheimana, kaja iva naoshinaomaya.”

⁷ Kha Prohona ili hānga, “Iva naoshinaomaya da mahānglu; kaja ina kachihoho apam saikorali na vāra, kala ina kakaso saikora chi nana matuira.

⁸ Athumli mangacheealu, kaja nali kanmi khavai ina nali ngasomida lei da Prohona hānga.”

⁹ Chiwui thili Prohona apāng katingrālaga imorchaili saza̱da ana ili hānga, “Yanglu, ina iwui tui nakhamorli sangmihaira.

¹⁰ Aja zimiksho yurbing kala wungrambing reoteklaga sākhai khavainilala, sākazamlaga ngakhuntā khavainilala, sākālaga lingsang khavainilala, nali kapanghaira da theilu.”

Khamahā Khani

¹¹ Kala Prohowui tui china ili rāhānga, “Jeremiah, nana khi theikhala?” Kala ina hānga, “Ina almond lijei akha thei.”

¹² Chieina Prohona ili hānga, “Nana mashungda theihaira, kaja iwui tui chi ungshung khavai ina yangda lei.

¹³ Prohowui tui chi ili kakhane sāda rāhānga, “Nana khi theikhala?” Ina hānga, “Atungshongwui eina ngareithui kahai ngaherda khalei ham akha thei.”

¹⁴ Chieina Prohona ili hānga, “Atungshongwui eina ngalei hiwui mi saikorawuitungli makaphā shokra.

¹⁵ Kaja yanglu, atungshong khalei wungram saikorawui shangbingli ina hoda lei, da Prohona hānga; athumna rāda mi ava̱va̱na Jerusalemwui ngavei zangkhavaili, chiwui phākho saikora kuimareida yangkhangasungli, kala Judah keinung saikorawui yangkhangasungli ichichāwui wungpamkhong rāsākāra.

¹⁶ Kala athumna ili horkahaiwui makhayā saikorawui vang ina athumwuitungli iwui bichar hāngmira; athumna khangatei varebingli nganamkaphā ot riktai, kala khalattawui pāng eina sākakhui otli khoruma.

¹⁷ Kha na, shānneira̱ neikhuilu; ngakarthuilu, kala ina kakaso kachiva̱ hi athumli hānglu. Athumna nali ning masuitā ngasakaranu, maningakha inala nali athumwui mangāli ning suitā ngasakpaishina.

¹⁸ Ngalei hupva, Judahwui awungabing, hiwui wungnaobing, hiwui pangmonbing, kala ngalei hiwui mibingli ngasung khavai, yanglu, ina aja nali khangazipa keinung, mari pākra̱, pithrai phākho ngasa ngasakhaira.

¹⁹ Athumna nali ngararra; kha nali mayuimara, kaja ina nali ngasomida lei da Prohona hānga.”