JAMES 5 - Kathara Bible (BSI)

Kashāngbingli Khamachin

¹ Ara nganālu, he kashāngabing! Nathumwuitungli rāki kaji kakhanang ringkashi chiwui vang chapngachālu.

² Nathumwui lan parhaira kala kashankachon makungna shaihaira.

³ Nathumwui sinā lupā maripai paihaira, kala maripai china nathumwuitungli makhamayā shākhi sāda nathumwui asā meichot thada chuitāhaora. Nathumna khanaowa zimikshowui vang lan kazipkhui.

⁴ Yanglu, lui vākhamebingli nathumna ngalangman makhamiwui vang athumna chapta lei kala athumwui kachapkhon Reikhamatai Proho Varena shāhaira.

⁵ Okathuili ringphālak eina sākhangangai sāda nathum okthuihaira. Taithatki kaji zimikshowui vang nathum khalatta uimathaohaira.

⁶ Angalang makhalei mili nathumna yonngasakta shaothathaira, ana nathumli mangasungmana.

Khāngkathei eina Seihā Kasa

⁷ Ivānaongarā, Prohona marāranglakha eina tangda khāngtheilu. Lui khavā mina ngaleiwui heithei samphang khavai zur, kān mateila zingrotra̱ ngaraipama.

⁸ Nathumla khāngtheiphalungra. Nathumwui kachihān ngatar ngasaklu, kaja Prohowui kharā zimiksho nganaihaira.

⁹ Ivānaongarā, nathum akha eina akha maphen ngarokalu, chithākha Varena nathumli bichar masāmara. Bicharwo rākida nganaikhailakhaira, rākachangrāli.

¹⁰ Ivānaongarā, Prohowui ming singda khamarānbing chili phaningunglu kala kachotkachānglungli ningzinghāringda khāngkahai athum chili ngayo khavai sāda khuilu;

¹¹ athumli khamahai hoi kaja athumna sipkasā khānga. Nathumna Jobwui ningzinghākharing shāhaira kala Prohona naoda ali kayākha mataisangmikhala kajila nathumna theihaira, khikhalajila phaningkhami kala leikashina pemtinghai.

¹² Mataimeikapta, ivānaongarā, khangashit kasāli shākhi masaalu; kazingla, okathuila, kala khiotkhala mamingzaialu, kha Varena bichar masā khavai ya kajili “Ya” jichinglu; ngga kajili “Ngga” jichinglu.

¹³ Nathumwui ngachaili kakhanang kachot leihaola? Ana seihā sāranu. Kachikathāna ringphāda leila? Anala laa sāda sochikatranu.

¹⁴ Kakazānao leihaola? Ana churchwui ararbingli holaga Prohowui ming singda thao neomilaga seihā sākhami

¹⁵ china kakazā mi chili kanmida Prohona ali ngakarthui ngasakra kala ana morei sākahai chila pheomira.

¹⁶ Chiwui vang eina kakazā raikhavai, akha eina akha morei hangphat ngaroklu, kala akhana akhawui vang seihā sāmilu. Khamashunga miwui seihā kasā ungshunglaka.

¹⁷ Elijahla ithum thada phasā khavaia mina. Ana kazing maro khavai panglāk eina seihā sai, chieina zingkum kathum, kachāng tharuk okathuili kazing maromana.

¹⁸ Chiwui thili ana seihā saluishit kaji eina kazing roluishita kala ngaleinala athei kharluishit ngasaka.

¹⁹ Ivānaobing, nathumwui ngachaili kachikathāna khamashungwui eina thuihaida zatphāphā kahai tharan kachikathāna ali hanung ngasakluishitakha,

²⁰ hi phaningunglu, kaja moreiwui khangui shongzāwui eina hanung khangasaka ana mipā chiwui manglā kathiwui eina kanmi kala morei kachungkha farormi ngasaka.