JAMES 4 - Kathara Bible (BSI)

Okathuili Khavāknao Kasā

¹ Nathumwui alungli khangama̱ khangashao hi khina shokkhangasakhala? Chi nathumwui ningli phasāwui ningkachāng otmāng kaphaning eina kashokna.

² Nathumna kahaolala masamphangrarmana; chiwui vang mi shaothatngai kala ngamarlala nathumna makhuirarmana, chieina nathumna ngama̱ ngashaowa. Nathumna Vareli makapowui vang kakahao ot chi masamkaphangna.

³ Nathumna polala masamphangmana, kachiwui vangkhala kaja nathumwui ningrin mamashungla phasāna ningkachāng chimāng poi.

⁴ He mashitkasanga mibing! Okathuili ngasotnao kasā hiya Vareli yangkashena da nathum matheimalā? Okathuili ngasotnao sākhangaia mi chi Varewui yangkashena.

⁵ Kathara tuili, “Varena ithumwui wuklungli sangmi kahai manglā chili makaphā ningkachāngna pemthuihaowa” da hāngkahai hili khamashung maleimana da phaninglā?

⁶ Kha Varena hakkhamei lukhamashan mi, chiwui vang eina hithada hānga, “Varena lāngkasobingli ngasunga, kha khangahuibingli lumashanmi.”

⁷ Chiwui vang eina Vareli mayālu kha chipeeli ngasunglu, chithākha nathumwui eina yāmhaora.

⁸ Vareli nganailu, chithākha ana nathumli rānganaimira. Morei kaphungabing, nathumwui pāng maziklu. Phākakhaningbing, nathumwui wuklung tharngasaklu.

⁹ Khanangda sifalaga chapngachālu. Nathumwui khamana̱ chi sikafa kala khamathān chi kakhanang onngasakra.

¹⁰ Prohowui mangāli malungnimlu chithākha ana nathumli reingasakra.

Avānaoli Bichar Kasā

¹¹ Ivānaongarā, nathum akhana akhali mamashāt ngarokalu. Avānao akhana avānao akhawuitungli khamashāt lah bichar kasā chi Ainli khamashāt kala bichar kasāna. Ainli bichar saakha nava Ain khamayona maningluimana, kha bichar kasaana.

¹² Ain khame kala bicharwo chi Varemānga. Amāngna huimishapa kala shimān ngasakshapa. Khongnainaoli bichar kasaa na khipāna da phaningkhala?

Langkasoli Khamachin

¹³ “Aja maningakha akhama ithum keinung chili vāra kala kumkha vāpamlaga leih londa tongkhuira” da kahāngabing, nathum nganālu.

¹⁴ Nathumwui mirinli akhama khi shokrakhala da matheimana. Nathum hiya kasha̱khawui vang ngachuilaga shimān kahai leichui kathāna.

¹⁵ Nathumna “Prohona mayāmida ithum ringakha hila chila sāra” da hāngki kajina.

¹⁶ Kha nathumna khayāning nganingda langsoi, hi khangui otna.

¹⁷ Kaphā sāki kaji thatheilaga makasā chi moreina.