ISAIAH 7 - Kathara Bible (BSI)

Awunga Ahaz wui vang Pao Akha

¹ Jothamwui naomayara awunga Ahaz, Uzziahwui ara̱na Judahli munglakha rai shokhaowa. Syriawui awunga Rezin eina Remaliahwui naomayara Pekah, Israelwui awungna, Jerusalemli rai ratai, kha makhuirarthuwa.

² Davidwui shimkhurli, “Syria eina Ephraim ngashikhaira,” da kahāng eina awunga eina awui mibing masili thingrongbing khanganuk thāda kathirhaowa.

³ Kala Prohona Isaiahli hānga, “Nawui naomayara Shear-jashub nani ngasoda chānrei ngalemli khalei Fullerwui Lui chiwui ra̱khong atopāwui ra̱sho khamor chili Ahazli asamphanglu,

⁴ kala ali hānglu, kahāng nganālu, kasaikha pamlu, mangacheealu, kala Rezinwui, Syriawui kala Remaliah naomayarawui malungkhavāt, meira̱hun kachui khani chiwui vang ning mashimānhaialu.

⁵ Khikhalajila Syriana Ephraim eina Remaliahwui naomayarali ngasoda nali makaphā sākhavai ngaranda hānga,

⁶ “Ithum Judahli shangsa kala ali sāmachitsa, ithumna yuikhui khavai sāsa, kala Tabe-elwui naomayarali awunga sāngasaksa.”

⁷ Proho VAREna hānga, chithāda mashokmara, ungkashungla maungshung mara.”

⁸ Kaja Syriawui akui Damascusna, kala Damascuswui akui Rezinna. (Zingkum hangtharukta phangāwui alungli Ephraim ngayānghaora chieina miyur akha mangasāluimara).

⁹ Ephraimwui akui Samariana, kala Samariawui akui Remaliahwui naomayarana. “Nana mashitsangakha, kachangkhat na manganingrarmara.”

Immanu-elwui pongli Machutkakhui

¹⁰ Prohona Ahazli hāngluishita;

¹¹ “Nawui Proho Varewui eina machutkakhui akha polu; chi Kathewui ram rankha thukranu, kazingramwui rankhala juiranu.”

¹² Kha Ahazna, “Ina machutkakhui mapomara, kala ina Proholi chāng tamkhayang masāmara” da ngahānkai.

¹³ Chieina Isaiahna hānga, “Chieina nganālu, O Davidwui shimkhur! Mibingli khanang khangasak chi mashapmada iwui Varelila khanang ngasakki kajila?

¹⁴ Chiwui vang eina Proho akhalattana nathumli machut akha mira. Yanglu, ngalānao akhana nao vaida mayarnao akha pharāra kala awuiming Immanu-el hora

¹⁵ Ana kashi-kaphā kapangkhuikathei tharan, seina̱ akhan eina khuira̱ zāra.

¹⁶ Kaja nao china makaphāli makhamayā, kala kaphā makapangkhuitheiranglakha eina tangda nathumna ngacheeda khalei awunga khaniwui ngalei chi ramchohaora.

¹⁷ Assyriawui awunga Ephraimna Judahwui eina pākthui kahaiwui eina thuilaga mashoklakrang kaji atam akha nathumwuitungli, nathumwui mibingwuitungli, kala nashāvāwui shimkhurwuitungli khuirāra.”

¹⁸ “Chitharan Egyptwui kong khamorli khalei hāchāng kala Assyria ngaleili khalei khui Prohona masikhon eina hokhuira.

¹⁹ Kala athum saikora, kongrā kathuthukli, lunghārwui amaitarenli, ka̱shāt kashoshok pamli kala seihomphungli rāpamserra.

²⁰ “Chitharan kong makānda khalei Assyria awungawui eina kuisighainao masākhuilaga kuila, pheihāla, morhāla sikoktāmihaora.

²¹ “Chitharan mi akhana simuknao akha kala yao khani kharing eina keisāra;

²² kala chiwui eina seina̱ mavātla samkaphangwui vang ana seina̱khan zāra; kaja lam chili nothā kahai mi kachiva̱na seina̱khan eina khuira̱ zāra.

²³ “Chitharan lupāsā thingthingwui man drakhārong thingthing leikasā yāmgui kachiva̱ phānāng eina ka̱shātna pemhaora.

²⁴ Mibingna malāthing eina kachākthing singlaga sā rengra; kaja, ngalei saikora phānāng eina ka̱shātna pemhaora.

²⁵ Kala tin eina lui vāsangkasā kaphung saikora chi phānāng eina ka̱shatli khangacheewui vang nathum marāmara, kha sha̱kei chihosang khavai kala yao hompam khavai apam ngasāhaora.”