ISAIAH 65 - Kathara Bible (BSI)

Ngakaikashibingli Varewui Danti

¹ “Ili makhangathingbingna ili phāranu, Ili makaphābingna ili samphangranu da ina ngarāna. “I hili leili, I hili leili” da ili makhangakao yurli ina hānga.

² Ngakaikashi mibingli langpongda ipāng katinga, makaphā apongli athum khalattawui khangarānli shura.

³ Iwui miktāli thangkachida ili malung thuingasakchingda yāmguili pha̱kaphayā, chektungli nganamkaphā thao rikkatā miyurna;

⁴ chikhurtungbingli kapambing, khangathumpamli ngayā pikazat, hokva̱sā kashaibing, kala ningkakachai otyurwui ara̱ athumwui hambingli pemtinghai;

⁵ ‘Nakhalatta ngateida pamlu, iwui ngalemli marālu, kaja I nawui eina ngateida haikahaina’ da hānga. Hikatha hi iwui nātangkhurli langpongda kachuiwui meikhutna.”

⁶ Yanglu, iwui mangāli kapihaili, “I kasaikha mapamara, kha ina runra, mha, nathumwui morei, avāva̱ ngarāwui moreiwui vangla ngarumlaga peichaoda runmira.

⁷ Khikhalajila athumna phungreitungli nganamkaphā riktai, kala chili ili khonkashitui hānga; athumna rida sākahai chiwui vang, ina peichaoda runkāmira.”

⁸ Prohona hithāda hānga: “Drakhāra̱ chi amazān eina samkaphang thāda, athumna hānga, ‘Chi masākazamhailu, kaja chiwui alungli sokhami lei,’ iwui raobingwui mingwui vang ina masākazamsermara.

⁹ Jacobwui eina ina ara-azā shokngasakra, Judahwui eina iwui phungrei shimlui kāngasakra; ina kapangkakhuiya china shimlui chi khuira, kala iwui raobingna chili sompamra,

¹⁰ Sharon seihomphung ngasāra, kala Achor Leiwuk sha̱keibing ngayai khavaipam sāra, ili kapha iwui mibingwui vang.”

¹¹ “Kha Proholi horkahai nathum, iwui kathara phungrei malaikahaibing, kala Gadwuivang table khangarānbing, Meniwui vang khamanāt zam khorām kachipembing;

¹² ina nathumli raighaili chithitra, kala nathum saikora shaokathatli zangserra; khikhalajila, ina kaho tharan nathumna mangahānkāmana, ina khamatui tharan nathum manganāmana, kha iwui mikyanli makaphā chi nathumna sai, kala ina maningkachāng chi nathumna kapangkhui.”

¹³ Chiwui vang Proho VAREna hithāda hānga: “Yanglu, iwui raobingna zāra, kha nathum thaira; yanglu, iwui raobingna mangra, kha nathum ra̱changra; yanglu, iwui raobingna mathānra, kha nathumli maishi ngasakra;

¹⁴ yanglu, iwui raobingna ning khamathānwui vang laa sāra, kha nathum ningkachotwui vang chapra, kala manglāli khangahuiwui vang sifara.

¹⁵ Nathumwui ming khonshātwui vang iwui kapangkakhuiali haimira, kala Proho VAREna nathumli shaothatra; kha awui raobingli ana aming khangatei phokmira.

¹⁶ Chithāda sāda ram chili khalatta kaso chili khamashunga Varenala somira, kala ram chili khangashit kasaa chipāli, khamashunga Varewui ming eina khangashit sāra; khikhalajila kharewui kakhanang saikora malaimihaowa, kala imikwui eina chibing chi ngathummihaowa.”

Kadhara Sem

¹⁷ “Yanglu, ina kadhara kazingram kala kadhara okathui sema; kala achālakhawui ot maphaningungluimara, kala ninglila marāza̱luimara.

¹⁸ Kha ina sākahai chiwui alungli ringphāda mathānchinglu; kaja yanglu, Jerusalem mathān khavai ina sāmi, kala awui mibing ringkaphāna.

¹⁹ Ina Jerusalemli ringphāra, iwui yurbingwui lungli ina mathānlakra; apam chili kachapkhon mashāluimara, kala ringkhangākhonla mashāluimara.

²⁰ Chiwui alungli angangnao kasha̱khamang okthuiya kaji maleiluimara, lah kasarnao maokkapeila mavaimara, kaja angangnaona kum shākharar eina thira, kala kum shākha makakā chi morei kaphunga khonshi kahaina jira.

²¹ Athumna shim sakāda chili pānra; athumna drakhārongrong lingsangda chiwui athei shaira.

²² Khangatei pamkhavai athumna shim masākāmara, khangateina zākhavai athumna malingsangmara; kaja thingrong akhawui okkapei thāda iwui mibingla okpeira, kala iwui kapangkhui kahaibingna athumwui pāng eina khanangda sākahai chi kasāngkha khuishaira.

²³ Athum aremali ot masāmara, unshimuiwui vang naola mapharāmara; kaja athum Prohowui sokhamiwui naotun ngasāra, athum eina ngasoda naongarābingla chithara.

²⁴ Athumna mangakaoranglakha ina ngahānkāra, athumna matuimamānlakha ina shāhairasāra.

²⁵ Kharāng eina yaonao phazārumra, kazingkha̱na mukkā thāda lanji shaira; kala chifana phara̱wui kashakazā sāra, iwui kathara phungreili sakazala kashimānla maleimara” da Prohona hānga.