ISAIAH 62 - Kathara Bible (BSI)

¹ Zionwui vang I kasaikha mapammara, kala Jerusalemwui vang I mangasāmara, awui mashun kahor thada mashokranglakha eina tangda, kala awui huikhami zarmei kashar mathāranglakha.

² Yurbingna nawui mashun otsak theira, kala awungabing saikora nawui tekhamatei theira; kala Prohowui khamor phokhami aming kadhar eina hora.

³ Prohowui pāngmayāli nava khamathāwui wungkuihon sāra, kala nawui Varewui mangāli hirā rukkasang ngasāra.

⁴ Nali Horkahai da maholuimara, kala nawui ramli Ramcho da maholuimara; kha ina nali Iwui khamathān ali lei da hora, kala nawui ramli Shakzā kahaiva̱ jira, kaja Prohona nali mathāna, kala nawui ramli ngakumra.

⁵ Kaja yaronnao akhana kachingva̱ akhali khangakum thāda, nanao ngarāna nali shakzāra; kala shakazā mayarana ngalāva̱ chili ningyāngkhaung thāda, nawui Varena nali ningyangungra.

⁶ O Jerusalem, nawui phākho tungli ina khamayonbing haimira; ngashun ngayā pongda, athum kasaikha mapammara. Nathumna phaningung khangasaka Proho chi khangasām mavaimana,

⁷ kala ana Jerusalem masākāranglakha, kala okathuili awui masot mamiranglakha ali mangasām ngasakmana.

⁸ Prohona awui yāpāng, kala kapanga pāngthei chi eina khangashit sāhaira; nawui heithei yangkashebingwui zāt masā ngasakluimara, nathumna khanangda vāsang kahai nathumwui atheira̱ yur khangateina mamangmara,

⁹ kha mā kahātbingna chi zāda, Proholi sochikatra, kala drakhāra̱ kazipkakhuibingna chi mangra, iwui kathara shim kayāngli.

¹⁰ Vālu, ngaveibing kānshoklu, mibingwui vang apong ngarānlu; sakālu, chānrei chi sakālu, ngalung pongshokserhaolu, mibingwui vang philān khāngkālu.

¹¹ Yanglu, okathui akatang vāshungda Prohona phongchithei haira: Zionwui naongalāva̱li hānglu, “Yanglu, nali huikhami rāhaira; yanglu, awui sāman ali ngasophungda lei; kala awui angathut awui mangāli lei.”

¹² Kala athumli Kathara Miyur, Prohona ngatangkakhuibing hora, kala nathumli Phakhui kahaiva̱ mahor kahaiva̱ keinung hora.