ISAIAH 58 - Kathara Bible (BSI)

Khamashunga Kakhum

¹ “Pangda vaolu, nakhon talla̱ kakhong thāda vaolu; iwui mibingwui khayon phongmilu, athumwui morei, Jacobshi shimkhurli.

² Chithālala athumna thangkachida phai, kala iwui apong theikhavai ningchānga, khamashung khangarong ot kasā miyur akha thāda, kala athum Varewui shiyan-chikan makaimana; athumna ili khamashung bichar poi, athumna Vareli khanganaili ringphai.”

³ “Ithumna kakhum eina kapam, nana khisāda matheithukhala? Ithumna hamsangakha khisāda nana chi mayangmithukhala?” Yanglu, nathumna khumlala nathum khalattawui ringkaphāmāng phai, kala nathumwui ot sākhamibingli rekhareka.

⁴ Yanglu, nathumna nganang ngazai khavai kala makhayā pāngngashum eina shirkhavaiwui vangmāng khuma. Aruihon nathumwui kakhum hikathā hina nathumwui khavao atungshong mashākā ngasakmara.

⁵ Mi akhana akhalatta hamsang khavai hikathāwui kakhum zimiksho hi ina kapangkhuila? Thingnā thāda akui mashuntāda, bora hamlaga hotlātungli kapam hirala? Prohona khuisangkapai zimiksho kala kakhum hili horala?

⁶ “Makaphā-makhayāwui kakhalap eina chiho khami, lāngkon khara̱bing khalātakhami, rekharek kahaibingli ningkhānkhami, kala lāngkon saikora sakhaikhami, hikathāwui kakhum ina kapangkakhui maningmala?

⁷ Kathaia mili nawui zāt ngayarmi khavai, shim makhalei kachāmali nawui shimli hokhaung; khamahongali kathei tharan, ali farormi khavai, kala nawui athei-asāwui eina nakhalatta mangathum khavai maningmala?”

⁸ “Chithākha nawui kahor ngathor thāda shokra, kala nawui kharai thaklāk eina rāra; nawui khamashung khangarong china namangāli zatra, Prohowui tekhamateina nakhanukli khamayona sāra.”

⁹ Chieina nana ngakaora, kala Prohona ngahānkāmira, nana ngavaora, I hili leili da ana ngahānkāra. “Nathumwui eina lāngkon chi nana khuithuihaiakha, pāng chiza̱da makaphā tui khamatui horhaiakha,

¹⁰ kathai miwui vang nakhalattana heishokmiakha, kala kakhanangawui ningkachāng chi ningyāng ungmiakha, tangkhamang lungli nawui kahor shokra, kala nawui ningkachot ngashunshong thāhaora.

¹¹ Kala Prohona nali thānmishonda kaphā otyur eina nawui ningkachāng ningyāng ungngasakra, kala nawui ara̱kui makang ngasakta; na tara̱ chaikhamiya yāmgui thāhaora, tara̱ makathenga ura̱wui tara̱ thāhaora.

¹² Kala nathumwui achālakha ngayāng kahaibing sākāluira; thot kachungkhawui shimphunga nathumna sākāra; kala nathumli kaikahai chiphokhame, chānrei semkāmiluishit khame” da hora.

Sabbath Khamayonwui Sāman

¹³ “Sabbathwui eina naphei ngareithuihaiakha, iwui kathara zimiksholi nawui ningkachāng kasāwui eina ngareithuihaida ngasāmkakhui zimiksholi kahaoakha, Prohowui kathara zimiksholi khayāshiakha; nawui ningkachāng masāla kala chāngnālak eina mamatuipamla nana khayāshiakha;

¹⁴ nana Proholi ningyāng ungra, kala ina nali okathuiwui kajuipambing chili khāngkāra; navā Jacobwui shimlui eina nali mizāra; kaja Prohowui khamor eina hāngtāhaira.”