ISAIAH 56 - Kathara Bible (BSI)

Varewui Mibingli Miyur Hupta Zangra

¹ Prohona hithāda hānga: “Mashun mayonlu, kala khangarong ot sālu, kaja iwui huikhami thākta rāra, kala iwui ngatangkhami phongshokra.

² Sabbath mamakhao ngasakla khamayona, makaphā kasāli pāng makhame, hithada kasaa mi kala chi singtit kaje miwui naomayara chi sokhamina.”

³ Proholi khalatta zang kahaia yur khangateina hithāda mahāngaranu, “Prohona awui miyurwui eina kachangkhat eina ili ngatei ngasakhaora” kala ahongana, “Yanglu, I kathenga thingrongna” da mahāngranu.

⁴ Kaja Prohona hithāda hānga: “Iwui Sabbathbing khamayon ahongabing, iwui ningyāngkhaungli phāda iwui tuingashit singtit kajili,

⁵ Iwui shimli kala phākholungli, naomayara kala naongalava ngarāli phākhamei phaningung khavai kala aming mira; makatat kapaiya, katang makhavai ming ina athumli mira.”

⁶ “Yur khangatei athum khalatta Proholi kazangbing, ali otram ngatha khavai, Proho mingli leishi khavai kala awui rao sākhavai, sabbath masāmakhaola khamayon kachiva̱ kala iwui tuingashit mayontit kajibing—

⁷ athumli iwui kathara phungreili khuivāda iwui seihā sākhavai shimli mathān ngasakra; iwui hanphuttungli athumwui rikkatā kachigat kala pha̱kaphayā chi khuisangmira; kaja iwui shim hi yur saikorawui vang seihā sākhavai shim hora.”

⁸ Israelwui eina kasham kahaiabingli hokakhuia, Proho VAREna, hithāda hānga, phākhuikahaibing chili lāngmeida kateila phākhuifara.

Israel Kathānabingli Khayon Khami

⁹ Luili khalei, ngahongli khalei sāyur nathum saikora, tukshai khavai rālu.

¹⁰ “Awui shantribing mik matheimana, athum theithangkhamei maleilakmana; khak khangasha̱ famānga, athum makhongtheimana; mang shimanda ngaleopi, kapili leikashibingna.

¹¹ Fabing chi morhāklaka, kashap mavaimana. Yaokahombingla theishingkakhui malei, athum saikora khalattawui apongli ngareithuihao, kachichāwui kānkhanāli phāda akhala akhala chisera.

¹² Athumna hānga, ‘Ralu, drakhāra̱ mangsa, ithum zamshei mangsangsa; akhamala aja thāda tangkhavai maleimara.’”