ISAIAH 52 - Kathara Bible (BSI)

Jerusalem Varena Ngatangkhuira

¹ Thuilu, thuilu, nawui yāng shirinkhuilu O Zion; nawui khamathā sāri ngavaikhuilu, O Jerusalem, kathara keinung; kaja ahui marim kashoka kala makathar mi nathumwuili marāluimara.

² Na khalatta chifa thuikathantāhaolu, ngakarthuilu, O narkahaiya Jerusalem, nakahungli khalap kahai chiwui eina, O narkahai Zionwui naongalava̱.

³ Kaja Prohona hithāda hānga: “Nathumli khikha eina mayorsangmana, pheisā mazangla ngatangkhuira.

⁴ Kaja Proho VAREna hithāda hānga: Khareli iwui mibingna Egyptli kharam vākhavai tai, kala ngalang maleila Assyrianaobingna rekhareka.

⁵ Ara iwui mibingli khikha makhaningwui vang khuithuihaira, ara ina khi sārakhala? da Prohona hānga. Athumwui khamungbingna chapa da Prohona hānga, kala langpongda katang mavaila iwui mingli chipata.

⁶ Chiwui vang iwui mibingna iwui ming theira, chieina chitharan, I hili leili, da ina kahāng chi athumna theikhuira.”

⁷ Phungreitungbingli paokaphā khuikaphunga chingri kahai vaomalānkhame, khamathāwui paokaphā khuikaphunga, huikhami vaomalānkhame, Zionli “Nawui Varena munga” da kahānga awui phei kayakha mathado.

⁸ Nganālu, nawui khamayonabingna vaoda lei, athum khamathānwui laa sarumda lei; kaja Zionli Prohowui latkhaung athumwui mik eina theingaroka.

⁹ Sākathān kahai Jerusalemwui apambing, laasak eina ngasoda vaolu; kaja Prohona awui mibingli ninglum ngasakhaira, ana Jerusalem ngatangkhuihaira.

¹⁰ Prohona awui tharkhamatheng pāngthei, miyur saikorawui miktāli chitheimihaira; kala okathuiwui akatang saikorana ithum Varewui huikhami chi theira.

¹¹ Thulu, thulu, hiwui eina shokulu, makathar ot masāza̱alu, awui eina shokta, nakhalatta tharngasaklu, Prohowui khorkhong kasingbing nathum.

¹² Kaja nathum katotsisi eina mashokmara, kala mayāmzatmara. Kaja Prohona nawui mangāshong rida zatra, kala Israelwui Varena nathumwui khanukshongwui kankhamena.

Kakhananga Rao

¹³ Yanglu, iwui raona mataisangra, ali mai kāda masot mira, kala juilāk kahai ngasāra.

¹⁴ Ali kachungkhana matakhakhai— amai ngapa̱-kahokhaida, mizak mathāmana; kala awui phasā miwui naomayarawui mathāmana—

¹⁵ Chithāda ana yur kachungkhali matakhakhai ngasakra; awungabingna awui vang khamor katimhaora; kaja athumli mahānghaikasā chi athumna theira, kala mashālakrangkasā chi athumna theikhuira.