ISAIAH 50 - Kathara Bible (BSI)

¹ Hithāda Prohona hānga: “Nava̱li ina chiho khavai kapāngwui lairik kali lei? Lha, iwui kachishuta khipāwui pangli nali ina yorsanghao? Yanglu, nawui khayonkhamāngwui vang nali yorkahaina, kala nawui khalāngwui vang nava̱li ina chiho kahaina.

² “I kharā tharan chili khisāda mi maleisāthu? Kaho tharan chili ngahānkā khavai khipākha maleithu? Ipāng sha̱nāhaida mahuimirarmara jihaola? Maningakha huimi khavai I pangshap maleithula? Yanglu, ina kakahar eina shamadru thengshapa, kongbingla siwuk sāngasaka; tara̱ khavātwui vang athumwui khaih nganamshishuna, kala ra̱kachang eina thiya.

³ Kazingrambingli ina tangkhamang ngavaimi, kala bora athumwui faror khavai sāngasaka.”

Proho wui Raona Kahāng Khanganā

⁴ Tamkachitheiwui male Proho VAREna ili mi, chieina ningkachotali kathāda tui eina ngasoda hāngphaneprakhala kaji ina theikhavaina. Ngathor kachida ana mathota, kala tamkakhuibing athum thāda shākhavai ikhanā ana mathing ngasaka.

⁵ Proho VAREna ikhanā mathing ngasakhaira, kala ina mangakaishimana, ina khanuk masa̱naungmana.

⁶ Kashaobingli ina khumkhor ngareimi, morhā kachichaibingli iwui maisor ngareimi; mashora mashokharor kala kakhayakwui eina imai mathumhaimana.

⁷ Kaja Proho VAREna ili ngachonmi, chiwui vang I mapa̱ngapāmana; chiwui vang imai meizailung thāda khāngpamda, I mamaishilakmara da ina thei.

⁸ Ili mashungkhame ana iwui ngalemli lei, ili khipāna ngahātshapra? Ithum nganingkāngarumsa. Iwui yangkashe khipākhala? Iwui ngalemli ralu jilu.

⁹ Yanglu, Proho VAREna ili ngachonmi, I yona da khipāna phongshapra? Yanglu, athum kashankachon thāda tāngurhaora; makungna shaiserhaora.

¹⁰ Nathumwui alungli Proholi khipāna ngachee, kala awui raowui khon khipana nganāli, tangkhamangli zatta kahor makathei, chithālala Prohowui mingli shitsangda Vareli kachihama khipākhala?

¹¹ Yanglu, thing khuisangda mei kasābing! Nathumna thing riksangda mei kasāwui kahorlungli zatlu! Nathumna hi ipāngwui eina samphangra; nathum kakhanang ringkashili pisangra.