ISAIAH 49 - Kathara Bible (BSI)

Israel, Yurbingwui Kahor

¹ O shamadrupheili khaleibing, nganālu, kala katāva̱li khalei nathum, ili nāshunglu. Naopamwui eina Prohona ili hokhui. Ishāva̱wui naopamli leilakha ana ili ming phokmihairasai.

² Iwui khamor kazana raighai thāda ana sāmi, apāngwui khaya̱li ana ili thummi; yutkazak kahai malāthing thāda ana ili sākhui, kala awui malākhongli ili thummihai.

³ Kala ana ili hānga, “Na iwui raona, Israel; nali iming tekmatei ngasakra.”

⁴ Kha ina hānga, “Ina aremali khananghaira, khikha makhaning aremawui vang iwui yāng chishothaira; chithālala iwui mashun Prohowuili lei. Ili hankhamila Varewuili lei.”

⁵ Ara ili awui rao sākhavai naopamli semkakhuia, Proho china hānga, Jacobli awuili khuiung khavai, kala Israel awuili kazip khavai vang, kaja Prohowui miktāli ili khayā kāngasaka, kala Varena iwui yāng ngasāhaira—

⁶ ana hānga: “Jacobwui shangbing nganaokhui khavai, Israelwui phāri kahaili khāngmathot khavai, nana iwui rao sāki kaji hi ngavenglak kahai otna; ina nali kahor akha sākhavai yurbingli mira, chieina iwui huikhami okathui akatang eina tangda vāshungra.”

⁷ Israelwui ngatangkhame, kala awui Katharapa, chinkākhailak kahaia, miyurbingna ningkachai kahaia, khamungabingwui rao chili, Prohona hithāda hānga: “Awungabingna theida ngakarthuira, wungnaobing athum khalatta ngakhumshāmsangra.” Khikhalajila ningkatonga, Israelwui Katharapa nali kapangkakhuia Prohowui vangna.

Zionli Pānngasakluishitra da Ngashitkhami

⁸ Prohona hithāda hānga: “Ngahankhangai atamli ina nali ngahānkāhaira, huikhami atamli nali ngachonmihaira; ina nali phārimi kala mibingli nali tuingashit sāda mihaira, ngalei sakā khavai, ngayāng kahai shimlui, yartālui khavai;

⁹ phātopnaobingli, ‘Ralu’ tangkhamangli khaleibingli, ‘Shoklu’ da hānga. Athumwui kazatpamli phauira, kaphung khangai saikorali athumwui wonui samphangra.

¹⁰ Athum kathaila mathaimara ra̱kachangla mara̱changmara. Masi kala zimikwui kasā chinala athumli masāza̱mara, kaja athumli lukhamashana china thānmira kala ura̱pamli athumli ngakuimira.

¹¹ “Iwui phungrei saikorali shongfa akha sāra, kala iwui mibing zatngatā khavai chānrei ngarānmira.

¹² Yanglu, iwui mibing katāva̱wui eina rāra, atung kala zingtunshongwui eina, kala hibing Syenne lamwui eina rāra.”

¹³ Khamathānwui vang laa sālu, O kazingram, sochikatlu, O okathui; mathānda laa sālu, O phungreibing. Kaja Prohona awui mibingli ningnganung ngasaka, kaja awui mibingli ninglum ngasakhaira, kala awui kakhanangbingli lumashanmira.

¹⁴ Kha “Prohona ili malaihaira, iwui Prohona malaihaira” da Zionna hānga.

¹⁵ “Na̱ mangda khalei naoli ava̱va̱na malaishapla, awui naopamwui eina kashoka awui naomayarali malumashanmarala?” Athumna malaihaisālala, iva nali mamalaimara.

¹⁶ Yanglu, nali iwui pāngmayāli yeksanghaira; nawui phākhobing iwui mangāli leichinga.

¹⁷ “Nawui sākakābingna nawui sākakazambingli thākmeiya, kala nali shimān khangasaka athum chi nawui eina thuihaora.

¹⁸ Namik kuimareida kapeiyanglu, athumna nawuili rākazipta lei. Prohona hānga, I ringlakha saikora hi nana sāri sāda ngavaira, nana chi khāmkahaiva̱wui thāda ngavaira.

¹⁹ “Kachangkhat eina nawui sākazam kahai, kala nawui chokahaipambing, kala nawui sākhayāng kahai lam — kachangkhat eina ara na nawui mibingwui vang teonahaora, kala nali mayuisang kahaibing katāva̱ thuihaira̱sāra.

²⁰ Nawui chapkhangachā atamli pharākasang naongarā china, ‘Apam hi iwui vang teonahaira; iwui vang sompam khavai mashā ngasakmilu’ da hāngfara.

²¹ Chitharan nawui ningli nana hāngra: Khipāna hibing ili pharāmikhala? I, kakhanangva̱ kala kashumva̱na, katāva̱li ili athā kahaina; laga khipāna ruikāser kajikhala? Yanglu, imang nothāhaisai; thakha katharan rāserluihao?”

²² Hithāda Proho VAREna hānga, “Yanglu, yurbingwuitungli ipāng khāngkāra, kala mibingli iwui khamachut chitheira; athumna naomayara ngarāli vamrāra, kala naomayarabingli athumwui khumkhorli phungungra, kala nanao ngalāva̱bingli yartuili tongungra.

²³ Awungabingna nathumli nganaokakhuiya avāva̱ ngasāra, awungva̱bingna nathumwui khanganaova̱ ngasāra. Athumwui mai ngaleili mashunzangda nathumli khorumra, kala nathum pheiwui chifa athumna malekra. Chieina I Prohona kaji nathumna theira. Ili khangaraibing chi mai mashimara.”

²⁴ Kapangawui eina awui sāshai khipāna ngapaikhuishap, lah sakashe khamungana nar kahai khipāna ngatangkhuishap?

²⁵ Kachangkhat, Prohona hithāda hānga: “Kapangawui narkahaibinglila khuishokra, rekakharekawui sāshai ngapaikhuira, kaja nali khangahātbing chili inala ngahātra, kala nanao ngarāli ina huikhuira.

²⁶ Nali rekakhareka athumli ina khalattawui asā chishaira, kala zam thāda athum khalattawui ashee eina marip ngasakra, chieina asā khavai saikorana, I nathumwui huikhame Proho, Ngatangkhame, Jacobwui Pangshapa china da theira.”