ISAIAH 45 - Kathara Bible (BSI)

Proho na Cyrusli Hākakhui

¹ Ana thao neomi kahaia, awui mangāli khalei yurbingli yuikhavai kala awungabingwui shānneira̱ raimi khavai, ngavei mashung khavai awui mangāli khalei khamongbing shomi khavai, awui yāpāng ina singkakhuia Cyrusli Prohona hithāda hānga:

² “Ina nali rizatra, kala phungreibing saikora ngacham ngasakra, ina pithrai khāmongbing akha̱ sāda shaokhaira, kala mariwui angumbing yortekhaora.

³ Ina nali tangkhamangwui lanbing mira, kala thumkahaipamwui pongrun kahaibing, chieina nana I Prohona kala naming singda hokakhuiya Israelwui Varena da theira.

⁴ Iwui rao Jacob kala kapangkhui kahai Israelwui vang eina ina nali mingsinda kahona, mingpho khamina, nana ili matheilala.

⁵ “I Prohona, khangatei maleiluimana, ili lāngda Vare katei maleimana; ina shaksāmi, nana matheilala,

⁶ zingshowui eina thuida zingtunshong vāshungda, ili lāngda katei maleimana kaji mina theikhavai. I Prohona, khangatei maleiluimana.

⁷ Kahorla tangkhamangla ina sai, kaphāla kashila ina sai, saikora hi kasā Proho chi ina.

⁸ O kazingram, atungwui eina kazing rotā ngasaklu, kala kazing eina khamashung khangarong rotā ngasaklu; okathuina chi mayākhuida, huikhami kharshokranu, kala china khamashung khangarongla shokngasak khavai ngasāranu; Proho ina sākahaina.”

⁹ Kasaali kakharara mi chi ringkashi ngasāranu, ham kasaali hamna ngararakha chitharanu! Ham kasaali leikhona, na khi semlikhala da hangla? lah nawui kasā hi angathan makāmana jila?

¹⁰ Avāva̱li “Nana khi pharālikhala?” lah ava̱va̱li khi eina na naora̱likhala? da kahāng mi chili kakhanang ngasāranu.

¹¹ Israelwui Kathara, kala ali kasaa Prohona hithāda hānga: “Inao ngarāwui apongli nana khi ngahān khavai lei, lah ipāngwui otsakwui pongli ili khi kaso khavai leikhala?

¹² Okathui ina sākhui, chiwuitungli mi sai; kazingrambing phayaikashok chi ipāngna, kala chili khalei saikora chili ina kasoda kashokna.

¹³ Ali ina khamashung khangaronglungli mathotkhuihaira, kala ina awui apong saikora ngatar ngasakra; ana iwui keinung sakāra, kala iwui tukthui kahaibingli ningkhān mira, amanla, lah sāmanwui vangla maningmana,” da saikorawui Prohona hānga.

¹⁴ Prohona hithāda hānga: “Egyptwui lan, Ethiopiawui ot, Sabeanwui mi asho alep khaungbing, nathumwuili rāda nathumwui ngasāra, athum nathumwui thishurra; athumna marikhara̱ ngathānlaga rāra, kala nathumli ngakhumsangda rākhorumra. Athumna nathumli poda hāngra: ‘Varena nathumāngli ngasomi, khangateina maningmana, A maningla vare katei maleiluimana’”.

¹⁵ Kachangkhat, nava khalatta khangathuma Varelaka, O Huikhame, Israelwui Vare.

¹⁶ Athum saikorali khayak ngasakta pa̱ngapāmihaira, meoma̱ sākakhuibing manātkaphotserhaira.

¹⁷ Kha Israelli katang makhavai huikhami eina ngasoda huimihaira; katang mavaila nathumli kakhayakla kala pa̱khangapāla malei ngasakmara.”

¹⁸ Kaja kazingram kasaa, (A Varena!), okathuiwui maong semkhuilaga chi sākakhuia (ana chi sakai; ngapa̱khangapā kasā maningla, somkhavai semkakhuia!) Proho china hithada hānga: “I Proho china, katei maleimana.

¹⁹ Tangkhamangramli, ina ngathumda mamatuimana; ‘Maphākakhuilungli ili phālu’ da Jacobwui ara̱-azāli mahāngmana. Proho iya khamashung tui matui, khamashung chi ina lānmiya.”

Apuk-apagawui Proho kala Babylonwui Meoma̱bing

²⁰ “Nathum khalatta kazipkhuilaga rālu, rānganaingarumlu, miyurbingwui thinengbing! Athum theikhuikathei maleimana, thing meoma̱ phungkazatabing athum, kala mahuimikharara meoma̱ chili khorumpama.

²¹ Hāngphatta nathumwui tuingaphun rāhānglu; athum ngasankhuingarumranu! Achālakha hi khipāna hāngkhala? Achālakhawui chi khipāna lānmi? Chi Proho ina maningmala? Kala I maningla vare katei maleiluimana, khamashung Vare kala Huikhame, I maningla katei maleiluimana.”

²² “Ili ngareiungda huikhuilu, okathui akatang saikora! Kaja I Varena, katei maleiluimana.

²³ I khalattana ngashit kahaina, khamashung khangaronglungli ikhamorwui eina shokhaira, malatungluiki kaji tuina: Yur kachiva̱na khuktida ili khorumserra, tui kachiva̱na shākhi sāserra.”

²⁴ “Prohomāngli khamashung eina pangshap lei da mibingna iwui pongli hāngra; ali ngakaikashebing awui mangāli rāda kakhayak samphangra.

²⁵ Israelwui ara̱-azā saikora Prohowui mangāli khayui kala tekhamatei ngasāra.