ISAIAH 41 - Kathara Bible (BSI)

Varena Israelli Ngashitkhami

¹ O shamadrupheili khaleibing, chingri eina ili nganālu; mibingna athumwui pangshap samphangluishitranu; athumna rānganaida hāngranu; ithum khokkha sāda bicharwui vang anganaisa.

² Zingshoshongwui eina khayuia mi akhali khipāna ngatha̱ ngasakta, awui vang sheba sākhavai ali hokhui? Awui pāngli ana yurbing horsangmi; kala awungabingli aphei eina nai, awui raighai eina athumli ana chifa thāda, kala phankazat mafakung thāda awui malā eina sāmi.

³ Ana athumli kharomvāda paisor eina ngaphankhui; aphei ngaleili mashongkaza̱ thai.

⁴ Hi haokaphok eina thuida tho-thotli khipāna kasā, khipāna shokkhangasak, kharela, khanaola, Proho chi ina.

⁵ Yireipheiwui mibingna theida ngachee, okathui kuimareida nganuka; athum nganaida rākazipserhaira.

⁶ Akhana akhali ngachona, kala, “Maningkharikalu!” da hāngra

⁷ them kasaana sina kasaali, mari khanamana mari kasaali, kasatkasang tui hāngngarokra; kala mari khangasun chili “Phālakhaira”, da hānga; kala mangatha̱ khavai athumna yotpi shaoshana.

⁸ Kha na iwui rao Israel, ina kapangshok kahaia Jacob, iwui ngasotnao Abrahamwui ara̱-azāna;

⁹ okathui akatangawui eina ina khuikashoka na kala tāmeikap kaji achikun matiwui eina hithāda nali hānga; “Na iwui raona, ina nali kapangkhuida horkahai masāmara”,

¹⁰ mangacheealu, ina ngasomida lei, kaphaning masuitālu, kaja I nawui Varena; ina nali yāng ngarumsangmira, ina nali ngachonmira, ina nali iwui khayuia yāpang eina kanmira.

¹¹ Mha, nali malungkhavātbingli pa̱ngapāda maishi ngasakra; nali khangahanbing chi khikha makhaning ngasāhaora kala shimānhaora.

¹² Nali khangahatbing chili nana phālala masamphangluimara; nali rai kasābing chi khikha makhaning sāthuihaora.

¹³ Khikhalajila nawui Vare, ina nawui yāpang singmida lei; “Mangacheelu, ina ngachonmira.” da kahānga chi ina.

¹⁴ Mangacheealu, kalomnao Jacob; Israelwui mibing nathum! Ina nathumli ngachonmira, da Prohona hānga; nathumwui Ngatangkhame chi Israelwui Kathara china.

¹⁵ Yanglu, ina nali mazaithing, ahā kakā kazana, kadhar akha sākhuira, nana phungreibing ngaphit kazamda akha̱ sāngasakra, kala nana phungrābingli lanji thāda sāmira;

¹⁶ nana mā thāda athumli hamra kala masina athumli phungthuihaora, kala siphan zingrotna athumli ngapha̱yāng ngasakhaora; kala nathumna Proholi mathānra; Israelwui Kathara chili nathumna sochikatra.

¹⁷ Kachāma kala khavātabingna tara̱ phāda; masamphangmana, kala ra̱kachangna athumwui male thengkahai tharan, Proho ina athumli ngahānkāmira, Israelwui Vare ina athumli mahorhaimara.

¹⁸ Ina ngaikhok kahai kajuili kong long ngasakra; tampākwui lungli ura̱ shokngasakra; lamhāngla ina ra̱khong ngasā ngasakra, kala ngalei kathengpamli ura̱ okngasakra.

¹⁹ Ina lamhāngli cedar, acacia, myrtle kala olive haimira; Ina ramcholi cypress, thingsanthing kala matangthing phorrum ngasakra;

²⁰ chieina mibingna theida, machukkhuira kala bhap tāngarumra, kaja hi Prohowui pāng eina kasāna, Israelwui Kathara china kasemna kaji.

Proho na varebingli Kakasir

²¹ Nathumwui tuingaphun khuirālu da Prohona hānga; chonchukla khuirālu da Jacobwui Awungana hānga.

²² Athumwui meoma̱bing chi khuirāranu, naoda khi shoknikhala kaji ithumli hāngranu. Shokkahaibing chi khimameikhala hāngmilu, shokki kachibing khimameikhala ithumli hāngmilu, ithum machukvaiga.

²³ Hiwui thili khi shokra̱khala kaji ithumli hāngmilu, chithāda nathum varebingna kaji ithumna theira; kaphāla sālu lah kashila sālu, chithāda ithumna kaphaning suitāra kala ngacheera.

²⁴ Yanglu, nathum khikha maningmana, kala nathumwui otla khikha maningmana; nathumli kapangkakhuia mi chi ningkakachaiyana.

²⁵ Ina atungshong eina akhali mathuk ngasakta ana rāhaira, zimik shokkhavaishong eina, ana iwui mingli ngakaora; ham kasaana ngalei khanai thāda, khamungabingli ana phei eina naira.

²⁶ Ithumna theikhavai rilak eina khipāna hānghaisākhala? kala “Ana mashunga” jikhavai khipāna achā hāngkhala? Khipānakha maphonglakmana, khipānakha mavaosanglakmana, khipākha nawui tui mashāsālakmana.

²⁷ Rimeikapta ina Zionli hānga, kala ina Jerusalemli khamathā pao mi.

²⁸ Kha ina akhayang tharan khipākha maleisā; athumwui ngachaili machinme mazangsāmana, ngahānkāmi khavai, khipākha maleisāmana.

²⁹ Yanglu, athum amahāmānga, athumwui otsak khikha maning; semkakhui meoma̱ chi khamasai masi kathā mānga.