ISAIAH 4 - Kathara Bible (BSI)

¹ Chithang sha̱nao shinina mayarnao akha ngakhunkhuida hāngra, “Ithumna ithumwui kashakazā zāra, ithumwui kashankachon ngavaira; ithumwui khayākhamala khuithui khavaiwui vangmāng naming eina theikhuingasakmilu.”

Jerusalemli Hankhuiluishitra.

² Chithanghon Prohowui aphāng chi mathāshunra kala tekmateilakra, kala ram chiwui athei china Israelwui ringda khaleibingwui vang langso khavai kala tekmatei khavai ngasāra.

³ Kala Zionli nothāhaida Jerusalemli pamkahaibing, Jerusalemli mirin peidawui ming chankahaibing;

⁴ Zionwui naongalava̱ ngarāwui khamakhao Prohona sāmathāmida Jerusalemwui alungli ashee neokatot kahai chi, bicharwui manglā kala kachuiawui manglāna tharmihaida athumli kathara hora.

⁵ Chiwui thili Zion kaphung kuimareida kala chiwui ngalemli khalei saikora chiwuitungli ngashunshong muiyā akha kala ngayāshong meikhut kala kahora meiwon akha Prohona shokngasakra. Tekhamatei saikora chiwuitungli khaya̱lar eina tārong leira.

⁶ China ngashun kasāwui eina khayinmi khavai, kala siphan zingrotwui eina ngayinkhui khavaina.