ISAIAH 39 - Kathara Bible (BSI)

Babylonwui eina Khara Paophungmebing

¹ Atam chitharan Babylonwui awunga, Baladanwui naomayara Merodach-baladanna Hezekiah kakazāwui eina raihaira kaji kashā eina chithi akha lemmet akha eina ngasoda khuivāmi khavai awui paome chihovai.

² Hezekiahna athumli ngarokkhui; ana athumli awui lan kazipshim, lupāsa, sina, nganamkaphāphābing, aman kasaka thao, awui raisāri saikora, kala awui kazip khavai shimbingli khalalei saikora chitheisera. Hezekiahna awui shimli khalei kala awui ngaleili khalei saikora makachithei maleimana.

³ Chiwui thili marān Isaiahna awunga Hezekiahli rāda hānga, “Mibing hina nali khi hāngkhala? Athum kachishong eina nawuili kharākhala?” Hezekiahna ngahānkai, “Athumna ngalei katāva Babylonwui eina iwuili kharāna.”

⁴ Ana hānga, “Athumna nawui shimli khi theimameihairakhala?” Hezekiahna ngahānkai, “Athumna iwui shimli khalalei saikora theiserhaira; iwui lan kazip khavai shimbingli khalalei ina makachithei maleimana.”

⁵ Chieina Isaiahna Hezekiahli hānga, “Saikorawui Prohowui tui nganālu:

⁶ Yanglu, nawui shimli khalalei saikora kala nashāvāwui ot aja eina tangda kaziphaida khalei, Babylonli phungunghaoki kaji atam rārāli; khikha mataimilakmara, da Prohona hānga.

⁷ Nana pharākakhui naomayarabing ngayarda khuithuihaora; Babylon awungawui konungli ahonga ngasāhaora.”

⁸ Chieina Hezekaihna Isaiahli hānga, “Nana Prohowui tui hāngkhami chi phai.” Kaja awui ningli, “Iwui thotli chingrihaida kalākashi mashokmara” da phaninga.