ISAIAH 36 - Kathara Bible (BSI)

Assyrianna Jerusalemli Khamachit

¹ Awunga Hezekiahna pānda zingkum tharāda mati kakā eina Assyriawui awunga Sennacheribna, mathālak eina raipan sākahai Judahwui keinung saikorali rai ratāda khuithuiserhaowa.

² Kala Assyriawui awungana Rabshakehli raimi kachungkha khuiphunglaga Lachishwui eina Jerusalemli khalei awunga Hezekiahwuili vāngasaka. Ana chānrei ngalemli khalei kachon ngasa̱ khavai pam ra̱khong atowui ra̱sho-khamorli ngaraipama.

³ Kala Hilkiahwui naomayara Eliakim mantri, awungawui thuilinga Shebna, kala Asaphwui naomayara kapime Joah athumna shok ngaroka.

⁴ Rabshakehna athumli hānga, Hezekiahli hithāda hānglu: Khareia awunga, Assyriawui awungana hānga; nana khili chihānda hiyākha ningnganungkhala?

⁵ “Thada tuina da khamatuina rairah kala raiwui pangshapna da phaningla? Khipāli chihānda ili khanganurkhala?

⁶ Yanglu, khāmshui azer, ali kashaibingwui pāngli kharunga Egyptli nana chihanli! Ali kachihambingli chithada kasa chi Egyptwui awunga Pharaohna.?

⁷ Kha nathumna ili, “Ithuma ithumwui Proho Vareli kachihānna” jiakha, chi awui kajuipambing kala hanphutpambing khuishokhailaga Judah eina Jerusalemli “nathumna hanphutpam hiwui mangāli khorumlu” da kahānga chi Hezekiah maningmala?

⁸ Ralu, iwui akhavā Assyriawui awungali khangashit akha sālu: Ina sigui thingkhani mira, nana chi tongkhavai mi phākhuishapakha.

⁹ Nana sigui-gari kala katongbingwui vang Egyptli chihānhaoda, iwui akhavā raobing ngachaili teomeikap kaje raimi kathāna akhawui tui makhuisangmara kajila?

¹⁰ Chili lāngda ngalei hi sākazam khavai I kharā hi Proho mazangmala? Ngalei chi asākazamhaolu da Prohona ili hānga.”

¹¹ Chieina Eliakim, Shebna kala Joah athumna Rabshakehli hānga, “Naraobingli Aramaic tui eina kahāngmilu, ithumla Aramaic tui shāsera; kaja Judahwui tui eina hāngakha pantungli khaileibingna shāhaipaishina.”

¹² Kha Rabshakehna hānglui, “Khalatta nathum pai zārumki kaje, ngachira mangrumki kaje pantungli khalei athumli tui hi hāng khavai kharā maningla, nathum māngli hāng khavai iwui akhavāna ili kachihola?”

¹³ Chiwui thili Rabshakehna nganinglaga panglāk eina Judah tui eina vaoda hānga; “Kahaka Assyria awungawui tui nganālu;

¹⁴ Awungana hithāda hānga ‘Hezekiahna nathumli machipat ngasakalu; kaja ana nathumli mangatangkhuirarlakmara.

¹⁵ Prohona ithumli ngatangmira, keinung hi Assyriawui pāngli mazang ngasakmara’ da Hezekiahna Proholi chihān khavai kasā chi makhuisangalu.

¹⁶ Hezekiahwui tui manganālu; kaja Assyriawui awungana hithāda hānga: Ili mashitlu kala iwuili zanglu; chithākha nathum mi kachiva kachichāwui drakhārong, khaorārong eina kashai samphangra kala reicha̱wui eina khamang samphangra —

¹⁷ Ina rāda, theishirai kala drakhāthei khalei, kashakazā, drakhā yāmgui khalei nathumwui ngalei kathā apam akhali makhuivāranglakha chithāsāra.

¹⁸ Prohona ithumli ngatangmira da Hezekiahna nathumli thānnguipaishina. Kachikatha yurwui varebingna awui yur Assyria awungawui pāng eina kankakhui leihairala?

¹⁹ Hamath eina Arpadwui varebing kali leili? Sepharvaimwui varebing kali lei? Athumna iwui eina Samaria khuithuihairala?

²⁰ Ngalei saikorawui ngachaili vare khipālongna athumwui ngalei iwui pāng eina ngatangshapta, Prohona Jerusalem iwui pāng eina ngatangmira kajikhala?”

²¹ Kha athumna khituikha mangahānkāla kasaikha pama; kaja awungana mangahānkālu jihaowa.

²² Chiwui thili Hilkiahwui naomayara mantri Eliakim, awungawui thuilinga Shebna kala Asaphwui nao kapime Joah athumna kashankachon serkhāklaga Hezekiahwuili vai kala Rabshakehwui tui saikora hāngchithei.