ISAIAH 33 - Kathara Bible (BSI)

Ngachonmi khavai Seiha

¹ Mina nathumli shimān khavai masāla kateili shimān khangasakbing; mina masāshila kateili sākashibing! Nathumna sākashimānwui thili nathumli shimān ngasakra; nathumna sāshikhui kahaiwui thili nathumli sāshida sāra.

² O Proho, ithumli khalumashanmilu; ithumna nali ngaraili. Ngathor kachida ithumwui pāngthei ngasāmilu, kakhanang atamli ithumwui huikhame sāmilu.

³ Nana ithumwui vang ngararmida ngashumkangkang kahai khon shālaga yurbingna yāma,

⁴ konghārna theishirai ngapāmkashai thāda, khaohna khangawok thāda, chiwuitungli mina ngawokrora.

⁵ Proholi khāngchikatsa; kaja ana atungshong pama; ana Zion mashun kala khamashung khangarong eina chipemira.

⁶ Kala ana nawui thotwui, khavāt makhalei huikhamiwui, thangkhamei, kala theishingkakhuiwui rungshinga ngasāra; Proholi khangachee hi awui lanna.

⁷ Yanglu, kapingabingna ngachonmi khavai ngakao dalei; chingri kahai khuirā khavai kasābingna soso chapli.

⁸ Chanreila sākazammihaira, khaung khavā mi maleiluimana. Tuingashit kaihaira, shākhibinglila chinhaira, mili theikhami maleiluimana.

⁹ Ngaleina sifada khāsuthaira, Lebanon pa̱ngapāda thengchenghaira; Sharon lamhāng thāhaira, Bashan eina Carmelna thingnā khanuktai.

¹⁰ Prohona hānga: “Ara I ngakarthui-ura I khalattawui pangshap sāshap chitheira.

¹¹ Nathumna lanjimāng phaninga, kala māfakungmāng shok ngasaka; nathum khalattawui khakna meithāda shimān ngasakra.

¹² Kala mibingla shunu kharik thāhaora, kashāt katatshatlaga meili thottā kahai thāra.

¹³ Katāva̱li khaleibing, ina khi sāhairakhala kaji nganāmilu; kala nathum nganaida khaleibing iwui pangshap theimilu.”

¹⁴ Zionli khalei morei kaphungbing ngacheehaira; Vare makatheibing nganukhaira: “Ithumwui ngachaili khipāna chuida khalei meili okthuirumshapra? Ithumwui ngachaili khipāna khamit makhavai meili okthuirumshapra?”

¹⁵ Kateikazāli yangkakharingbing, Pheizā-kazāli pāng mathara̱kasangbing, ashee kashok otli manganākasangbing, makaphā otli mayang kasangbing china khamashung eina zata, khangarong tui matui,

¹⁶ athumna kajujuili pānra, awui ngayinkhui khavaipam lunghārwui raipan ngasāra; awui kashakazā ali mizāra, tara̱la mavātmara.

¹⁷ Nawui mik eina awungali awui khamathā alungli theira; lam khamashā chi namikna theira.

¹⁸ Naningna khangachee phaningungda: shai khangashaipa, rākachigat khān katampa chi kali lei? Dolan mashing kashānpa kali vahao? da machukra.

¹⁹ Matuikatāpta mashākhuikapai, malekhangapao thāda hāngkakatota tuitorabing chi nathumna matheiluimara.

²⁰ Ithumwui phanitphanao sākhavai keinung Zionli yanglu! Chingri kahai, makhangatha̱ Jerusalem nathumna theira; chiwui karhui masuthuirarmara, khara̱la masāshatrarmara.

²¹ Kha chili Prohona ithumwui vang marikhong, jahas marākapaipam hakkhamahā kong kathā ngasāra.

²² Kaja Prohona ithumwui bicharwona, Prohohi ithumwui khamungana, Prohohi ithumwui awungana; ana ithumli huimira.

²³ Nathumwui khānghuira̱ jathaira; phungva̱li makhalappaithura marikhong kachon mahārpaithura. Chitharan otla, kashai-kashakla tuimataida ngayar ngarokra; sheikasha̱bing eina tangdala ngaponkhuira.

²⁴ Kala chili okkathuibingli khayonkhamāng pheomiserhaida, khipākha “I kazāli” majiluimara.