ISAIAH 31 - Kathara Bible (BSI)

Varena Jerusalemli Ngākmira

¹ Khangachon pokida Egyptli katā, athumwui siguili kachihānbing, kakhanang ngasāranu, siguigari kachungwui vang, raimibing kapingwui vang shitsangda, athumna Israelwui Katharali, mayangmana, Proholi maphāmana kala mangahānmana.

² Kha chithālala ana thangmeihaida kalākashi khuirai; kala awui tui masutmana, kha makaphā kasā shimkhur kala khayonkhamāng kasāli khangachonbing, athumli mathāhaimara.

³ Egyptnaobing mikumona, Vare maningmana; athumwui sigui asā-khavaiana, manglā maningmana. Prohona apāng kakating tharan khangachona chi ngaphokra, ngachonmi kahaia chi kongluira, athum saikora shimānrumhaora.

⁴ Kaja Prohona ili hithāda hānga: khangazana, kazingkha̱naona sā shailakha, yaokahoma kachungkhana kharomrālala, kaholala, ngur-ngurhailala makhangachee thāda; saikorawui Prohona Zion kaphungli kala chiwui kaphungbingli ngarar khavai tāra.

⁵ Vanaobingna khayip thāda, saikorawui Prohona Jerusalemli makārmira; ana makārmida kanshokmira; shākmida khāngkhuimira.

⁶ Nathumna ngakaishitingting kahaiali ngareiunglu, O Israelnaobing!

⁷ Kaja chithanghon nathumwui pāng morei pemting eina nathumna sākakhuia lupāsāwui meoma̱, kala sina eina sākakhui meoma̱ saikora nathumna horhaora.

⁸ “Assyriali raighai eina pitā ngasakra, mikumowui raighai makhaning; raighai china ali shaitāhaora; ana raighai chiwui eina yāmra, yaronnaobingli thoukai phung ngasakra.

⁹ Awui lunghārla ngacheerarang thuihaora, awui akhavābing kathiriri yāmserhaora” da Zionli mei khaleiya, Jerusalemli sharkha̱ khavaiya Prohona hānga.