ISAIAH 24 - Kathara Bible (BSI)

Proho Okathuili Danti Mira

¹ Yanglu, okathui hi Prohona ramcho ngasakhaora, kala chamjoro ngasakra, leimai masho ngacheimihaida okthuikasābing ngapha̱yānghaora.

² Ayaonaosanli kasā thāda pāngmonbinglila sāpapamra; raonaobingli kasā thāda akhavābinglila chithāpapamra; rao sha̱naoli kasā thāda akhavaiva̱lila chithāpapamra; khalopāli kasā thāda khayorapālila sāpapamra; kachishutali kasā thāda kashukalila chithara.

³ Okathui hi ramchochao ngasakra, kala sakhayāngserhaora; kaja Prohona tui hi hānghaira.

⁴ Okathuina chapngachāda thenghaowa, apuk-apagana ngazanhaida thenghaowa; kazingramla okathuili ngazanruma.

⁵ Okathui hi mikumona sāmakhaohaowa; kaja athumna ain mangākmana, shiyan sākhaihaowa; katang makhavai tuingashit mamayonthuwa.

⁶ Chiwui vang eina khonshātna okathuili shaisanghaira; kala chili okkathui saikora athumwui khayonkhamāngwui vang chotchānga; chiwui vang okathuili okthuida khalei saikora kāngthathaida mi kateokhamang taimaya.

⁷ Zamna chapngachai, drakhārongna thenghaowa, ringkaphā ning saikora khāsuthaira.

⁸ Khamathānwui phung kashao chingrihaira; khamathānwui akhon vihaira; ringkaphāwui tingteilāla chingrihaira.

⁹ Athumna laasak ngasha̱da drakhāra̱ mamangluimana; zamshei khamanga athumwui vang khāshihaowa.

¹⁰ Pa̱khangapāwui keinung sāshimānhaira, shim kachiva̱ mi mazang khavai shunghaira.

¹¹ Chānreili zam makhaleiwui vang ngawunkharopa; ringkaphā saikora ngalathaira; okathuiwui khamathān shimānhaira.

¹² Keinung ramcho ngasāhaira, ngaveila shaokhaida ngayāngserhaira.

¹³ Kala okathuiwui lungli, yurbingwui ngachaili hithāda shokra, oliverong ngaphitkachup kahai thāda, mahāpei mārem khanai thāda.

¹⁴ Athumna khamathānwui laa vaowa, Prohowui khangam-kharei chili zingtunshong eina vaorai.

¹⁵ Chiwui vang eina zingshoshong Proholi tekmatei ngasaklu; shamadru pheibingli, Israelwui Vare Prohowui mingli.

¹⁶ Okathuiwui akatanga eina Khangarongapali tekhamatei sokachikat laakhon ithum shai; kha ina hānga, I chānghaira, I chānghaira. I kalākashi! Kaja sākashena sāshilak eina sai.

¹⁷ Khangachee, chom, kala khalen nathumwui vang ngasāhaira, O okathuiwui mibing!

¹⁸ Khangacheekhon shālaga khayāma chi chomli tāzangra; kala chomwui eina yāmkashoka chi khalenli manra. Kaja kazing khāmong shohaida okathui katonga nganuka.

¹⁹ Okathui ngayāngchaohaira, okathui ngakhumpakhaira, okathui khanuk khayāngserhaira.

²⁰ Khamaripa mi thāda okathuina khayitzata, rām thāda nganuka; khayonkhamāngna shirenhaida kongluithang mangakarthukluimara.

²¹ Chithanghon kazingramli, kazingwui mibingli tandi mira, okathuiwui awungabinglila okathuili Prohona tandi mira.

²² Phātopnao thāda ngaleikhurli athumli tuksanghaora; athumli phātopli shungnamhaora; kala atam kasangkhawui thili tandi minaora.

²³ Chitharan kachāngna pa̱ngapāra, zimikna khayakhaora; kaja saikorawui Prohona Zion kaphungli, Jerusalemli kala awui ararbingwui mangāli khamung tharan awui tekhamatei chitheira.