ISAIAH 22 - Kathara Bible (BSI)

Jerusalemwui pongli Pao Akha

¹ Khamahā tampākwui pongli khamarān tui. Nathum saikora shimtung kajujuili kaser kahai hi khi kakhalatkhala,

² khonkazār, ngaunlop kahai maikakā keinung nathumna jila? Nathumna sāthat kahaibing chi raighai eina mathimana kala raipamli mathimana.

³ Nathumwui khamungabingla yāmrumserhaira; athumli malā masingla tukkhuihaira. Nathum kathathei saikoralila tukkhuiserhaira, athumna katāva̱li yāmvāhaisalala.

⁴ Chiwui vang eina ina hānga: “Ili mayangrālu, ina kakhanangwui vang chapngachāga; iwui mibingwui naongalāva̱bingli sāshimān kahaiwui vang ili masuiphanepalu.”

⁵ Kaja saikorawui Proho Varivarana ngashumkakang, yāmung yāmvāda, pa̱khangapāwui phākho shaokakhai, kala phungreibingli khangavao, zimiksho akha ngarānhaira; khamahāwui tampākli.

⁶ Kala Elamna siguigari kala katongbingli ngasoda malākhor khuiphunga, Kirna chāngvei phunga.

⁷ Nathumna ningchāngmeikap kaji tampākbing chi siguigarina pemhaira; kala sigui katongabingna ngavaveili rairim sai.

⁸ Ana Judahwui faror khavai khuithuimihaira. Chithang nathumna Ngahongwui Shimwui raisāribing chili yanga,

⁹ kala Davidwui keinungpam kakai kachungkha khalei chi nathumna thei; khanema ra̱khongwui eina nathumna tara̱ tāsoka,

¹⁰ kala nathumna Jerusalemwui shim shānkhui, kala shimbing chi sākhailaga pan savai.

¹¹ Kachama Ra̱khongwui tara̱ kazipkhui khavai nathumna pan khaniwui ngachaili ra̱shak sākhui. Kha chi achā eina sakharikhaikasāpali nathumna mapha̱mana, khayālamashimana.

¹² Chithanghon saikorawui Proho Varena sikafa kala chapkhangachā, kui sikatā, bora khangavai atam khuirāra,

¹³ kala yanglu ringkaphā eina khamathān, mukkā kala yao taikathat, sā kashai eina zam khamang: “Zāsa, mangsa, kaja akhama ithum thihaora” da kasā atam rāra.

¹⁴ Saikorawui Prohona akhalatta ikhanāli hāngchithei: “Kachangkhat eina khayonkhamāng hi nathum mathiranglakha eina tangda mapheomirarmara” da saikorawui Proho VAREna hānga.

Shebawui Mahut Eliakimli Kasang

¹⁵ Saikorawui Proho VAREna hithāda hānga, shimkhurli yangkhame kala lanse Shebnali vāda ali ahānglu:

¹⁶ “Na hili khi sarakhala kala hili nana khipāli haida chikhur kashophutkhala, lungzipamli chikhur kaokakhui, lunghārpamli shim sākakhui khi sāvairakhala?

¹⁷ O kapanga yaronnao, Prohona nali katāva̱li kahaikarvāhaora. Ana nali chichaititkhuira,

¹⁸ kala khayiyitlaga thingphāng kahor thāda ngalei khamashā akhali horvāhaora, chili na thira, kala nawui tekmatei khavai siguigaribing chi nawui akhavāshi shimkhur maishi khavai ngasāhaora.

¹⁹ Ina nawui otpam eina katatshokhaora, kala nali nawui pam eina kathangshokhaora.”

²⁰ “Chithanghon Hilkiahwui naomayara iwui rao Eliakimli hokhuira,

²¹ kala nawui katuma phahon chi ali ngavaimira, nawui shānneira̱ ali neimira, kala nawui pangshap chi ali sangmihaora. Kala ana Jerusalemli kapambingwui, Judah shimkhurwui avāva̱ ngasāra.

²² Kala ina Davidwui shimkhurwui sho awui yartuili haira; ana shora, khipānakha mashungmara, kala ana shungra, khipānakha mashomara.

²³ Makhangatha̱pamli thing shunkasang thāda ina ali shuntitsangra; kala ana avāva̱wui shimkhurwui khayākakā wungpamkhong akha ngasāra.

²⁴ “Shimkhurwui kasak-kapai katonga, ara̱-azāla, khorkhongla tengkot eina thuilaga kahaka ot eina tangda awui pāngli leira.

²⁵ Chithang, makhangatha̱pamli, rida shunsanghaikasā thing chi ngachohaora kala katattāhaida chili parhaikasā kharit ot tātunghaora” da saikorawui Prohona hānga.