ISAIAH 21 - Kathara Bible (BSI)

Yirei Lamhāngwui pongli Khamarān

¹ Yirei lamhāngwui pongli khamarān tui: Negebli sur khaningkazat thāda, chi lamhāng eina rai, sākashe ngaleiwui eina.

² Sāshilak kahai khamahā akha ili rāhānghaira; khangapona china ngapona, sākakazama china sākazama. Kaulu, O Elam, kuinamkhuilu, O Media; athumna ningreikhāsuthai khangasak saikora ina tang ngasakhaira.

³ Chithāda sāda iwui kashān kachotna pemhaira, khangasheina ili kuinamhaira, sha̱naona naokhara̱wui kachot thāda; ili hamzang ngasakhaida mashārarthuwa, I kaphaning suitāhaoda imik matheirarthuwa.

⁴ Ining nganingunghaira, khangacheena khakshingakhaira; Ina yupyup kahor ningkachāng chila iwui vanga kakathir ngasāhaira.

⁵ Athumna table runghaida kachonla hamhailaga phāshak phazai. Ngakarthuilu, O wungnaobing, changveili thao neolu!

⁶ Kaja Prohona ili hithāda hānghaira: “Vālu, raikān akha hailu, ana katheithei chi hāngmiranu.

⁷ Sigui katongnao, gadhā katongnao, ut katongnao khanini ngalengkazat chi theiakha ana munlak eina nganā kazakkhuiranu”.

⁸ Chieina katheia china vaowa: “O Proho, thangkachida ina tārongli ngashānpama; kala ngayā kachida iwui otpam machihohailakmana.

⁹ Kala yanglu, katongabing rārāli, sigui katongbing khanini eina!” Kala ana ngahānkai, “Kongluihaira, Babylon kongluihaira; kala awui meoma̱bing katongala ana ngaleili sākazamihaira!”

¹⁰ O iwui hātkhui kahaia kala hamkharikkhui kahaibing, Israelwui Varivara, saikorawui Prohowui eina ina nathumli kahāngna.

Dumahwui pongli Khamarān

¹¹ Dumahwui pongli khamarān tui: Mi akhana ili Seirwui eina hodalei, “Shantri ngayā kayākha sāngfara? Shantri ngayā kayākha sāngfara?”

¹² Shantrina hānga: “Ngathor rārādalei, kha ngayāla rāluira. Nana kalikha ngahānluingaiakha rāngahanluinaolu”.

¹³ Arabiawui pongli khamarān tui. Arabiawui khararpapamli nathum pamra, O Dedanwui ut ashangva̱ tongkazatbing.

¹⁴ Ra̱kachangbingli tara̱ khuirāmilu! Yāmkazatbingli khamui eina angaroklu O Temawui ramnaobing.

¹⁵ Kaja athum raighaiwui eina yāmhaira, sutshok kahai raighaiwui eina, hunkahai malāwui eina, kala rai khangasungwui eina.

¹⁶ Kaja Prohona ili hithāda hānga, “Kumkhawui alungli, ngalang kapheiawui zingkum athishurda, Kedarwui tekhamatei saikora tanghaora;

¹⁷ kala Kedarwui nao ngarāwui kapinga malā singkathei kateokhamāng taimara; kaja Proho Israelwui Varena hāngkahaina.”