ISAIAH 2 - Kathara Bible (BSI)

Katang Makhavai Chingrikahai

¹ Amozwui naomayara Isaiahna Judah eina Jerusalemwui pongli kathei tuina.

² Naoda hithāda rāshokra kaja Prohowui shimwui phungrei chi phungreibingwui ngachaili juimeikap kaje phungrei sāda sākāra; kala phungrābingwuitungli juimeira; kala yur saikora chili longsangra,

³ kala yur kachungkhana rāda hāngra: “Ralu, ithum Prohowui phungreili, Jacobwui Varewui shimli kāsa; chieina ana ithumli awui apong tamchitheida ithumna awui shongfali zatra.” Kaja Zionwui eina ain chi shokra, kala Prohowui tui Jerusalemwui eina shokra.

⁴ Yurbingwui ngachaili ana bichar sāmira, kala miyur kachungkhawui vang tuikup khuirāmira; kala athumwui raighai tin sākhuihaora, kazei chi khainao sākhuihaora; miyur akhana yur khangatei akhali rai masāmara, rai khavā kaho matamluimara.

⁵ O Jacobwui shimkhur, rālu, Prohowui kahorli ithum yaothuisa.

Lāngkasobingli Shimān Ngasakra

⁶ Kaja nawui mibing, Jacobwui shimkhurli nana makhuisangthuwa, khikhalajila athum zingshoshongwui meowor khamachutabingna pema, Philistinenaobing thāda khanongbingmānga; kala athumna yur kateili ngashikta ot sai.

⁷ Athumwui ngaleili sina eina lupāsana pemtinghai, kala athumwui lan chi kakān mavaimana; athumwui ngalei siguina pema, kala awui siguigari shānla makhuimana.

⁸ Athumwui ngalei meoma̱na pemtinghai; athumwui pāng eina sākakhui, pāngmareng eina sākhui kahai ot chili athumna ngakhumsangda khoruma.

⁹ Chithāda mili maishi ngasaka, kala ngazan ngasaka athumli mapheomialu!

¹⁰ Prohowui khangachee-khangachā chiwui eina, kala awui shingam chiwui tekhamatei eina lungharlungli yāmsangda, chifali ngathumhaolu.

¹¹ Mibingwui ngamsor kahai mikyanli nemngasakra, mibingwui langkasoli maishi ngasakra; chithanghon Prohomāngli masot mira.

¹² Kaja lāngkaso kala masosei kahai, mina lumkakā kala khāngkachikata athumli saikorawui Prohona makhamayā atam lei;

¹³ masosei kaphora Lebanonwui cedarthing saikorali makhamayā; Bashanwui shirimthing saikorali makhamayā;

¹⁴ kajuia phungrei saikora; masosei kahai phungrā saikorali;

¹⁵ dolan kajui kachiva̱li, khangazipa raipan kachiva̱li;

¹⁶ Tarshishwui marikhong saikora, kala khamathā pāngthem saikoralila.

¹⁷ Hiksor kahai mili maishi ngasakra, miwui langkaso ning nemta ngasakra; chithang Prohomāngli masot mira.

¹⁸ Meoma̱ saikora shimānserhaora.

¹⁹ Kala okathuina ngachee khavai Prohona ngakarkathui tharan, awui khangachee-khangachā chiwui eina, awui shingam tekhamatei chiwui eina, mibingna lunghārwui akhurli yāmsangra, ngaleikhurli yāmngathumra.

²⁰ Chithanghon athumna khorum khavai athum khalattana sākakhui lupāsāwui meoma̱, sināwui meoma̱bing chi, kafabing kala kongharbingli hormihaora;

²¹ okathuina ngachee khavai Prohona ngakarkathui tharan, awui khangachee-khangachā chiwui eina, awui shingamwui tekhamatei chiwui eina, lungharbingwui akhurli, kala amaitarenwui akhur-akhaili yāmngathumra.

²² Nātangkhurli khaksui khalei mi chiwui eina yāmlu, kaja awuili kānkhanā khi leikhala?