ISAIAH 18 - Kathara Bible (BSI)

¹ Ah, marikhong huizatkhavai Ethiopia kong kānda khalei ngalei!

² Nile kong tara̱tungli konā marikhong tonglaga wungva̱ kachiho! Vālu, kathāka paomebing, asho-alep khaunga yurli, khanganailila katālila khangacheea yur, kapanga kala rai khayuia yur, kongbingna khangakai ngaleili.

³ Apuk-apagali khalei nathum saikora, okathuili kapama nathum hupta, kaphungli khamachut akha kashok tharan, yanglu! talla̱ kakhong tharan, nganālu!

⁴ Kaja Prohona ili hithāda hānga; “Zinghām malingting kahai thāda, mahā kachāngwui ikra̱ kaphunga muiyā thāda, iwui pamkhavaiwui eina ngathumda yangtāra”.

⁵ Kaja mahā marāranglakha, awon wonkup kahai thili, kala awonbingna khamina drakhāthei ngasākahai tharan, ana aphāngbing chi khainao eina katatmihaora, kala ashonbingla ana yortāmihaora.

⁶ Athumwui asā phungreibingwui sā kashaia vānaobingli, kala okathuiwui sāyurbingli chishaihaora. Sā kashai vānaobingna lum ngaheivaira, okathuiwui sāyurbingna si zangvaira.

⁷ Atam chitharan saikorawui Proholi, asho-alep khaunga miyur akhana lemmet rāchikatra; khanganailila katālila khangacheea yur, kapanga kala rai khayuia yur, kongbingna khangakaia ngaleiwui eina saikorawui Prohowui ming kaho Zion Kaphungli khuirāra.