ISAIAH 17 - Kathara Bible (BSI)

Varena Syria eina Israelli Kashong Lāngra

¹ Damascuswui pongli khamarān: Yanglu, Damascus hi keinung mangasāluimara, kashimān khorkahai ngasāhaora.

² Awui keinungbing katang mavaila ramphohaora; yaoshangbingwui vang ngasāhaora, athum chili pira, kala athumli khipānakha mangachee ngasakmara.

³ Raipan chi Ephraimwui eina, wungram chi Damascuswui eina shimānhaora, kala Syriawui shākkahaibing chi Israelwui naongarāwui tekhamatei thāhaora da saikorawui Prohona hānga.

⁴ Kala chithanghon Jacobwui tekhamatei nemtā ngasakhaora; kala awui asāwui kathao suitāhaora.

⁵ Kala chi, mā kahātana nganingda khalei mārong kahāt thāda kala apāngna mā vamkasang thāda, kala Rephaimwui luili mātham kaphā thara.

⁶ Oliverong athei phālaga atham akha khani, kajuiya aphāngtungli, aphāngli mati phangā taikahai thāda taira da Israelwui Proho VAREna hānga.

⁷ Chithanghon mibingna athumli Kasema chili khayāshira; kala athumwui mikna Israelwui Kathara chili yangra;

⁸ athumwui pāng eina sākakhui hanphut chili khayā mashimara; kala athumwui pāngmareng eina sākahai chili mayangluimara; Asherimranu lah nganamkaphāwui hanphutbingranu.

⁹ Chithanghon Hivnaobing kala Amornaobingna aram ngalei Israelnaobingwui vang eina chiho kahai thada, athumwui khangazipa keinungbingla ramchoserhaora.

¹⁰ Kaja nathumna nathumwui Vare huikhameli malaihaowa, nathum ngayin khavai Lunghar chili maphaningungthuwa; thingrong khamathāthā linglala, vare khangateiwui vang thingphāng shunlala;

¹¹ nathumna lingthang kharshok ngasaklala yaosangthang ngathor nathumna awon won ngasaklala; sikafa kala maraikapai khangashei zimikshothang heithei saikora yāmhaora.

Yangkashe Yurbingli Yuihaira

¹² Ah, mi kachungkhawui khangashum, athumna shamadruwui khangashum thada ngashumkakanga, Ah, yurbingwui kakhanang, kongra̱ kathuiwui thāda ngashum kakanga!

¹³ Yurbingna tara̱ khangaphaowui kakhanang thāda ngashuma, kha ana athumli khararra, kala athumna yāmserhaora, masina phungreitungli lanji phankathui thāda, kala siphanna chifa-chihā khaningkathui thāda ana athumli kashama.

¹⁴ Ngazinshong yanglu, khangachee! Ngathor marāranglakha athum maleisāthuwa! Ithumli ngapon kazābing, kala ithumli sākakathānbingwui yar chi hina.