ISAIAH 14 - Kathara Bible (BSI)

Raithā kahaiwui eina Hankhaung

¹ Prohona Jacobli lumashanmira kala Israelli kapangkhuiluishitra, kala athumwui ngaleili ungchipamluishitra, kala yur kateibingna athumli ngasoungda Jacobwui shimkhurli rānapra.

² Kala miyur kateina Israelnaobingli athumwui pamli ngasoungra, kala athumli rao mayarnao, rao sha̱nao sāda Prohowui ngaleili Israelwui shimkhurwui ngasāra, kala athumli tukkakhuibing chili athumna tukkhuira, kala athumli rekakharekabing chili athumna mungra.

³ Otram ngatha̱ khangasak eina ngasoda nathumwui kachot, kakhanang kala kharita otram khangatha̱ chiwui eina Prohona nathumli ngasāmkhui khangasak tharan,

⁴ nathumna Babylonwui awungali zeikakharui tui hi hāngra: “Kathāda rekakharek chi ngasāmhao, achei makathei sākashi kathāda atanghao!

⁵ Prohona makaphā mibingwui khāmshui chi sātekmihaira, khamungabingwui khānthing,

⁶ yurbingli malungvātta chieina mangasāmla ngaphita, lukhamashan maleilakla rekharekta munga.

⁷ Okathui hupta chingri-va̱rihaira; athumna laa sāphoka.

⁸ Matangrongbingna nali mathāna, Lebanonwui cedar thingrongbingna mathānda hānga, ‘Nali maishi ngasakhaoda ta̱kateka khipākha ithumli marāthura.’

⁹ “Na rāthang nali samphang khavai azingshong Kathewui ramli kasatsanghaira; okathuiwui kathāna sākasā saikora nathumli samphang khavai kathi khaya̱li mathuk ngasakhaira; yurbingwui awunga sākasā saikorali wungpamkhongwui eina mathotkhui.

¹⁰ Athum saikorana matuida nali hāngra: ‘Nala ithum thāda khangazana ngasāhaira, ithum thāhaira!

¹¹ Nawui ringkaphā lumkhalao kazeiramli khuizanghaira, nawui tingteilākhon eina ngasoda; nawui pet mathanmānga, kala nawui fakasangna ka̱chaimānga.’

¹² “Kazingwui eina na kathāda tātunghao! O Ngashunwui sirā, Ngathorwui naomayara! Nali kathāda ngaleili hortāhao, yurbingli nemkhangasaka na!

¹³ Nawui ningli hithāda phaningsai, Varewui sirātungli juimeida ina kazing kāra; iwui wungpam juilak eina sākāra; tālāk kahai atungshong yarui kazip kaphungli ina pamra;

¹⁴ muiyāwui kajui tungli ina kānra, I khalatta Juimeikap kaje chi sākhuira.

¹⁵ Kha nali kazeiramli khuitāhaira, chomwui kathuka chili.

¹⁶ “Nali katheibingna pakpak yangda nawui pongli phaningkachungra; ‘Okathui nganuk khangasaka, wungrambing khanuk kakathāna mi chi hila?

¹⁷ Apuk-apaga siwuk thākhangasaka, chiwui keinung kachungkhali yuikashapa, awui phātop kazangnaobingli shim mahanung khangasaka mi chi hipāla?’

¹⁸ Yurbingwui awunga saikora tekhamateilak eina pihaira, kachichā khalattawui chikhurli.

¹⁹ Kha nale nawui chikhurwui eina katāva̱li horshok kahaina, naopharāt makhaunga thāda; kala raighai eina ngashumkathatbingwui angun eina ngasoda romkahai; chomwui lungpha̱li tākazang thāda, pheizingli naikazam kahai kathingun kathāna.

²⁰ Athumli ngasoda nali machifarumara, khikhalajila nana nawui ngalei sākazamhaira, nawui mibingli nana sāthathaira. Makaphā kasābingwui naotunbingwui aming masingluilakranu!

²¹ Avāva̱ ngarāwui khayonwui vang nao mayarābingli sāthat khavai ngarānlu; athumna ngakarthuilaga okathui hi khuida keinungbing eina ngasoda apuk-apaga pemngasakpaishina.”

Varena Babylon Shimān Ngasakra

²² Saikorawui Prohona hānga: “Ina athumli mamayāmara, kala Babylonwui eina awui ming eina shākkahai, naotun kala kashāng-khareiwui eina katathaora, da Prohona hānga.

²³ Kala ina kazinghokli pamkhavai sāngasakra, ra̱khong sāngasakhaora; kala chi kashimānwui shimphut eina pha̱mathāra, da saikorawui Prohona hānga.”

Varena Assyria Shiman Ngasakki kaji

²⁴ Saikorawui Prohona ngashithaira: “Ina khangarān sākahai chithāda shokra, kala ina rinkahai chithāda leipapamra.

²⁵ Kaja iwui ngaleili ina Assyria sakhaira, iwui phungreitungli ipheizingli naikazamra; kala awui kashai chi athumwui eina khalātahaora, kala awui kharita otphun chi athum yārtuiwui eina ngavātāhaora.

²⁶ Hi okathui katongawui vang sākahai kharin china, kala miyur saikorawuitungli katingshok kahai pāng chi hina.”

²⁷ Khikhalajila saikorawui Prohona rinkahai chi khipāna shimān ngasakshapra? Apāng katingshokhaira, kala chi khipāna ngakhunzangluishapra?

²⁸ Ahaz Awunga thikum khamarān hi shoka:

²⁹ O Philistia, nathum saikora, nathumli ngaphit khavai lijei tekhaowa da mamathānlu; kaja phara̱wui angayung eina chaoshai shoka chiwui athei chiya khayonga phara̱ ngasāra.

³⁰ Kala kachāmawui naochizaina zāra, kala khangazanabingna tāphup eina pikhuira. Kha nawui angayung chām eina ina chithitra, kala nawui shākkahai ina shaothatra.

³¹ Chapngachālu, O ngavei; chaplu O keinung; khangachee eina menglu, O Philistia, nathum saikora! Kaja meikhut atungshong eina shoka, kala awui raimiwui ngachaili ngacheekazār maleimana.

³² Yurwui paomebingli khipāna khi ngahānkārakhala? Prohona Zion phākhui kahaina, kala kakhanang samphang kahai awui mibingna chili ngayin khavai samphanga.