ISAIAH 12 - Kathara Bible (BSI)

Ningkashi Khami Laa

¹ Chithang nana hāngra: “O Proho, ina nali ningkashi mira; kaja ili nana malungvātsālala nawui malungkhavāt ngalanthuihaowa, kala nana ili ninglum ngasaka.

² Yanglu, Vare iwui huikhamena, ina shitsangda mangacheemara; kaja Proho VARE iwui yāngna kala iwui laana; kala ana iwui huikhame ngasāhaira.

³ Khamathān eina ngasoda nana huikhami ra̱khongwui eina tara̱ sokkhuira.”

⁴ Kala chithanghon nana hāngra: “Proholi ningkashi milu, amingli vaolu; awui otsak yurbingli chitheilu, awui mingkhamayāng vaomalānlu.

⁵ Proholi masotlaa sālu, kaja ana tekmateilak eina sāhaira; okathui saikorali hi theingasaklu;

⁶ Vaolu kala khamathānwui vang laa sālu, O Zionli kapambing, kaja nathumwui alungli Israelwui Kathara chi hakmahālaka.”