ISAIAH 11 - Kathara Bible (BSI)

Chingri kahai Wungram

¹ Jessewui angunrumwui eina ashon akha shonshokra, kala angayungbingwui eina aphāng akha shokra.

² Kala Prohowui Manglāna awuitungli ngasāmra, manglā chi thangkhamei eina theishingkakhuiwui manglāna; machinkhami eina pangshapwui manglāna, awor eina Proholi khangacheewui manglāna.

³ Kala awui ringkaphā chi Proholi khangacheewui alungli leira. Awui mik eina kathei chieina bichar masāmara, kala khanā eina kashā chieina tuilep makhuimara.

⁴ Kha khamashung khangarong eina ana kachāmabingli bichar sāmira; kala okathuiwui malung khanimbingli mashun eina tāzakta machukmira, kala okathuili awui khamorwui lijei eina ngaphitra, kala amorchaiwui khaksui eina makaphā makhayābing chili sāthatra.

⁵ Khamashung khangarongna awui shānneira̱ sāra; ningkatongna awui kashān khalap khavai sāra.

⁶ Kharangna yaonaoli ngasoda pamra, kala kuirāngna menaoli ngasoda pira; seinao, kazingkha̱, kala keikhamathao sha̱kei homrumra, kala kateowa naoshinao akhana athumli thānra.

⁷ Simuk eina singom phazārumra; athumwui naobing pirumra; kala kazingkha̱na mukkā thāda lanji shaira.

⁸ Na̱ mangda khalei angangnaona phara̱khur ngalemli ngareora, kala na̱ reikahai naona phara̱khurli pāng thara̱sangra.

⁹ Iwui kathara kaphungli athum kalākashi kala kashimānla maleiluimara; kaja shamadru tara̱na kachipem thāda, Prohowui theithangkhamei okathui pemhaora.

Raithā kahaibing Hankhaung

¹⁰ Chitharan yurbingwui machut khavai Jessewui angayungna thuinganingra; miyurbingna ali phāra, kala awui pamkhavaibing tekmateishunra.

¹¹ Chitharan Assyriali, Egyptli, Pathrosli, Ethiopiali, Elamli, Shinarli, Hamathli kala shamadrupheiwui ngalemli shākkahaibingli kazipkhuiluishit khavai Prohona kakhane sāda awui pāng tāngvāluira.

¹² Miyurbingwui vang machut khavai ana akha shokngasakra; Israelwui ngakhei kahaibing chili kazipkhuira, Judahwui ngapha̱yāng kahaibing chili kazipkhuira, okathui achikun matiwui eina.

¹³ Ephraimwui mikpaikashi chi pākthuihaora, kala Judahli rekakharekbing chi katathaora, Ephraimna Judahli mamikpaishimara, kala Judahna Ephraimli marekharekmara.

¹⁴ Kha anina zingtunshong Philistinenaobingwui yārtui tungli yongrorra; kala anina ngarumda zingshoshongwui mibingli ngaponra. Anina Edom eina Moabli makhamayā pāng parra; kala Ammonnaobingna aniwui kahāng nganāra.

¹⁵ Kala Egypt shamadruwui male Prohona shimānchao ngasakra; kala Kong chiwuitungli apāng khayitra awui sākhamatai masi eina ra̱shong shini shokngasakta chieina mibingna kathengli kānpaira.

¹⁶ Nothā kahai awui mi shākkahaibing chiwui vang, Egyptwui eina kashok tharan Israel wui vang chanrei sākhami thāda, Assyriawui eina chanrei akha sāmira.