HOSEA 9 - Kathara Bible (BSI)

Hoseana Israelwui Danti Chishātkhami

¹ Khamathān masaalu, O Israel! miyurbingwui thāda mamathānalu; kaja nana nawui Vareli horhaida kayorwui otsak sāhaira. Lanpum saikorali khayorva̱̱na khamasāli leishithuihaira.

² Lanpum eina drakhāthei vaichumna athumli maphauimara, kala drakhāra̱ kadhar masamphangmara.

³ Athum Prohowui ngaleili maleimara; kha Ephraimna Egyptli latungra, kala athumna Assyriali makathar kashakazā zāra.

⁴ Athumna Proholi ra̱shakchigat mapha̱mara, kala athumwui pha̱kaphayāna ali mapenmimara. Athumwui khamui chapkhangachābingwui khamui kathā ngasāhaora, chi kashai mi saikora makhaohaora, kaja athumwui khamui chi athum kathaiwui vangmānga; chiya Prohowui shimli marāshungmara.

⁵ Retmi kahai phanitli nathum khi sārakhala, kala Prohowui zātkhānli khi sārakhala?

⁶ Kaja yanglu, athum Assyriali vāki jiura, Egyptna athumli kazipkhuira, Memphisna athumli chifara. Lenghuina athumwui sinā lupā khuithuihaora, athumwui kachonshim ka̱shat phormithaora.

⁷ Tandi khamiwui atam rāhaira, athut kakhuiwui atam unghaira; Israelna chi theira. Marān hi mangkhama̱na, manglākazanga mi chi kapāna, nawui hakkhamahā khayonkhamāng kala ningkakachaiwui vang eina kharāna.

⁸ Marān chi Ephraimwui khamayonana, iwui Varewui miyurli khamayonana, chithālala vānao khalen kasāpana awui shongfa saikorali khalen sanghaira, kala awui Varewui shimkhurli ningkakachai chi leihaira.

⁹ Athum khalatta zakshilāk eina sāmakhaohaira, Gileadwui atamwui thāhaira; ana athumwui khayonkhamāng chi phaningungra, ana athumwui morei chili tandi mira.

Israelwui Morei kala Chiwui Athi

¹⁰ lamhāngwui drakhāthei thāda, ina Israelli samphanga. Matheikhare khaorāthei thāda ina nashāvā ngarāli thei. Kha athumna Baal-peorli vāda Baal varebing mangāli athum khalatta tharchigata; kala athumna ningkachānga ot thāda athumla ningkachaihaowa.

¹¹ Ephraimwui tekhamatei chi vānao thāda yongthuihaora, naokapharā, naokhavai, naokakāla maleimara.

¹² Athumna nao pharāsalala ina akhala mashākmila khuithuiserhaora. Ina athumli pākkahai tharan, athum kakhanang ngasāranu!

¹³ Ephraimwui naomayarabing, ina kathei thāda sāshaiwui vang ngarānhaira; Ephraimna awui naomayarabingli sāthat khavai thānshokphalungra.

¹⁴ Athumli milu, O Proho! nana khi mirakhala? Nao tākhavai kala na̱ thengkhavai athumli milu.

Israelwuitungli Proho wui Khaktak

¹⁵ Athumwui makaphā kachiva̱ Gilgalli lei; chili ina athumli ningkakachai haophoka. Athumwui makaphā makhayā otsakwui vang ina iwui shim eina kashamshokhaora. Ina athumli maleishiluimara; athumwui otva̱bing ngakaikashimānga.

¹⁶ Ephraim khananghaira, athumwui angayung thenghaira, athum athei mamatheimara. Kalikha athumna nganaokhuisalala, athumna leikashia naongara ina sāthathaora.

Marānna Israelwui pongli Kahāng

¹⁷ Iwui Varena athumli horshokhaora, kaja athumna ali manganāsangmana; athum yurbingwui alungli zaizākazatbing ngasāhaora.