HOSEA 8 - Kathara Bible (BSI)

Meoma̱li Khokharumwui vang Proho na Israelli Yonkashinam

¹ Talla̱ chi namorchaili khāngkālu, kaja khalāngsāsha akha Prohowui shimtungli pa̱da lei. kaja athumna iwui tuingashit sākhaihaira, kala iwui ain kaihaira.

² Athumna ili ngakaoda, iwui Vare, Israelnao ithumbingna nali thei, da hānga.

³ Kaphā kaho Israelna khalanhaira; yangkashena ali kharomra.

⁴ Athumna awungabing kapangsanga, kha iwui eina maningmana. Wungnaobing kapangshoka, kha iwui kaphaning makhuimana. Athum khalatta shimān khavai lupāsā kala sinā eina meoma̱ sākhui,

⁵ Ina nawui seinao khalanhaira, O Samaria. Athumli iwui malungkhavāt chuida lei. Athum tharki kaji karankha leirakhala

⁶ Israelli? Them kathema akhana sākakhuina, chi Varivara maningmana, Samariawui seinao chi akha̱ sāmihaora.

⁷ Kaja athumna masi yaosanga, kala athumna sur hātkhuira. Nganingda khalei mārongbing athei makāmana, zāt mashokmara; shoklala khangateibingna ngapaizāhaora.

⁸ Israelli mayuisanghaira; ara yur khangateiwui ngachaili khikha masā khavai ham kathā ngasāhaira.

⁹ Kaja athum Assyriali vāhaira, kharar sigui thāda ngachakyāng eina zatta lei; Ephraimna leikashebing masākhuihaira.

¹⁰ Athumna khamashit yur khangateiwui eina masākhuilala, ina thāklak eina kazipkhuihaora. Kala athumna atam kasha̱khawui vang awunga kala wungnaobingli tharkachisin masāmara.

¹¹ Kaja Ephraimna morei sākhavai hanphutpam kachungkha mataisanghaira, chi athumwui vang morei sākhavai hanphut ngasāhaira.

¹² Ina athumwui vang ain lishing thingtharārā kapisasi kaja, athumna chi ngateihang kahai akhana da khuira.

¹³ Athumna pha̱kaphayā ningchānga; athumna asā pha̱phayai kala chi shai; Prohona chi ningyāngkhaung maleimana; ara ana athumwui khayon chi phaningungda, athumli morei chiwui vang tandi mira, athumna Egyptli latungluishitra.

¹⁴ Israelna Kasā-akhavali malaihailaga, wungnaoshim sakai; kala Judahna pan sākahai keinung kachungkha mataisanghaira; kha ina awui keinung kachiva̱li mei akha chihorāra, kala china awui raipan shimānngasakra.