HOSEA 7 - Kathara Bible (BSI)

¹ Ina Israelli raikhami tharan, Ephraimwui khamakhao, kala Samariawui makhayā otsak phongshoka; kaja athumna nguida ot sai, khale china shimkaiya, kala ngaponkazābingna ayarshong ngapona.

² Kha ina athumwui makaphā otsak saikora phaningunga kaji athumna maphaningmana. Ara athumwui otsakna athumli tumhaira, saikora ina theisera.

Konungwui Tuishot

³ Athumwui makhayā china athumwui awungali mathān ngasaka, kala athumwui sākahai china wungnaobingli mathān ngasaka.

⁴ Athum saikora shām kasā misera; athum sālak kahaiya meiphung kathāna, khamui naihailaga makapchungranglakha eina tangda, khamui kasaana mei masākashimit thāda.

⁵ Ithumwui awungawui zimiksholi wungnaobing zamwui kasāna kazāhaowa; ana mana̱kashebingli ngasoda pāng katinga.

⁶ Kaja athumwui makaphā khangarān wuklung meiphung thāda chui; ngayā pongzongrida athumwui malungkhavāt chi ngāntai; ngathorshong meiwon thāda chuishoka.

⁷ Athum saikora meiphung thāda sai, kala athumna athumwui ngalei khamungabingli tukshaiya. Athumwui awunga saikora kongluihaira; kala athum khipākha ili mangakaomana.

Israel kala Yurbing

⁸ Ephraimna yurbingli manātpama; Ephraim hiya makhamina khamuina.

⁹ Khangatei yurna awui yāng kānmihaira, kha ana chi matheimana; kuila ngapoktokhaira, chila ana matheimana.

¹⁰ Israelwui lāngkaso china ali khalatta mamayāmana, chithālala athumna athumwui Vare Proholi malatungmana, thatheilaga kaphāla maphāmana.

¹¹ Ephraim hiya mangkhama̱, ning makhalei nāsha̱ kathāna, ana Egyptli hoi, Assyrialila vai.

¹² Athumna vāmamān, ina iwui khailan athumli herrorra; ina athumli yongkazata vānaobing thāda ngakhuntāra; athumwui makaphā makhayā otsakwui vang ina rākra.

¹³ Athumli kakhanang ngasāranu, kaja athumna iwui eina yāmthuihaira! Athumli sākakathān ngasāranu, kaja athumna ili ngarara! Ina athumli ngatangkhuingai, kha ili kakapik tui hānga.

¹⁴ Athumna ili wuklung eina mangakaomana, kha athumwui pettungli chapama; kashakazā eina zamwui vang athum khalatta rimkazama, athumna ili ngakaishi.

¹⁵ Ina athumli tamchitheilala, athumwui pāngthei makang ngasaklala, athumna iwuitungli makaphā awor sai.

¹⁶ Athumna Baalli ngareivai; athum sākashe malā thai, athumwui wungnaobing raighai eina pitāra, athumwui lāngkaso malewui vang. Hina Egypt ngaleili athumwui zeikakharui ngasāra.