HOSEA 5 - Kathara Bible (BSI)

¹ Hi nganālu, O pāngmonbing! Khuisanglu, O Israelwui shimkhur! Nganāsanglu, O awungawui shimkhur! kaja bichar chi nathumwuina; kaja na Mizpahwui vang khalen ngasāhaira, kala Taborli khailan horror kahaina.

² Kala athumna Shittimwui chom chi thuklak eina chuihaira; kha athum saikorali ina rākra.

³ Ina Ephraimli thei, kala Israel iwui eina mangathumpaimara; kaja O Ephraim, nana khayorwui ot sai, Israelli sākhamāng ngasakhaira.

Meoma̱rinli Hoseana Hāngkhamathin

⁴ Athumwui otsakna Varewuili malatung ngasakmana. kaja athumwuili khayorva̱̱wui ning lei, kala athumna Proholi matheimana.

⁵ Israelwui lāngkaso awui maiyanli lei; Ephraimna awui khayon chili phei ngaphokra; Judahnala athumli ngasoda phei ngaphokra.

⁶ Athumna Proholi phākhavai yaoshang, kala sha̱keibingli ngasoda phāra; kha masamphangmara; ana athumwui eina ngalanthuihaira.

⁷ Athumna Proholi mashitsanglākla sai; kaja athumna shāmnao pharai. Ara kachāng khawok eina, athumla, athumwui luila shimānserhaora.

Judah kala Israelwui Rai

⁸ Talla̱ khonglu, Gibeahli, Ramahli khonglu. Ngashar khavaikhon Bethavenli khonglu; kathirlu, O Benjamin!

⁹ Ephraim ramcho ngasakhaora, tandi khami zimiksho chili; Israel shangbingwui ngachaili kachangkhatta, chi ina phongmira.

¹⁰ Judahwui wungnaobing ngaleiwui thari kaphura athum thāserhaira; athumwuitungli iwui malungkhavāt tara̱ thāda heirora.

¹¹ Mashun bichar athishurda Ephraimli rekharekhaira; kaja arema otli shurra jihaowa.

¹² Chiwui vang eina iya Ephraimwui vang makung kathāna, kala Judah shimkhurwui vang apar kathāna.

¹³ Ephraimna awui kazāt kathei tharan, kala Judahna awui khamā kathei tharan, Ephraimna Assyriali vai, kala kahaka awungali chihovai. Kha ana nali maraimirarmana kala nawui khamā maphāmirarmana.

¹⁴ Kaja iya Ephraimwui vang kazingkha̱ kathā, kaja Judah shimkhurwui vang kazingkha̱nao kathā ngasāra. I khalattana sākazamlaga thuihaora, ina phungthuihaora, khipānakha makānluirarmara.

¹⁵ Athum khalattana khayon theikhuida ili maphākhuiranglakha eina tangda, kala athumwui kachot tharan ili maphaningungranglakha eina tangda, iwui shimli latunghaora.