HOSEA 4 - Kathara Bible (BSI)

Proho na Israelli Kaphen

¹ Prohowui tui nganālu, O, Israelnaobing! kaja Prohona ngalei chili kapam mibingli mamayākhangai lei. Shitkasang katong kala lumashankathei maleimana, kala ngalei chiwui alungli Vareli kathei maleimana;

² shākhi kasā, kakapik, shaokathat, khalee ot kasā kala phokaphāmāng lei; masaalu kaji saikora athumna sai, kala shaokathatwuitungli shaokathat ngarora.

³ Chiwui vang eina ngaleina chapngachai, kala chili kapam saikora ning thengchenghai; kala ngaleiwui sāyurbingla, khamasaili yongkazata vānaobingla chota; kala ngayiwui khaihbing eina tangda khuithuihaira.

⁴ Khipānakha nali khayon maphaaranu, kaphenla maphenaranu; kaja phenki kaje, phāki kaje chi imānga, O pāngmon.

⁵ Na ngashunshong kongluira, marānla nali ngasoda ngayāshong kongluira; kala nashāva̱li ina shimān ngasakhaora.

⁶ Theikakhui khavātwui vang iwui miyur shimān ngasakhaira; kaja theikakhui chi nana makhuingaithuwa, iwui pāngmon khangasāwui eina nali khalanhaira. Kala nana nawui Varewui ningkhami malai kahaiwui vang, inala nawui naongarāli malaira.

⁷ Athum chungsangkhangai chungsang, iwuitungli morei chungkhangai chungda sai; athumwui tekhamatei chi ina kakhayak onngasakra.

⁸ Iwui mibingwui moreitungli athumna ngaleozai; athumwui khayonkhamāngwui vang ngamara.

⁹ Kala mibinglila, pāngmonbinglila ina athumli ngaraichāda tandi mira, kala athumwui otsak athishurda kachichāwui sāman mira.

¹⁰ Athumna zālala, mathomara; athumna khayorva̱̱wui otsak sāra, kha mamayāsangmara; kaja athumna khayor otli leishihaoda Proholi malaihaowa.

Meoma̱ Khokharumli Proho na Khayon Kaphen

¹¹ Zamna, zamsheina theishingkakhui shimān ngasaka.

¹² Iwui mibingna thingwui otli ngahāna, kala athumwui khāmshuina ngahānkāmi. Kaja khayor otsakwui manglāna athumli thānnguihaowa, kala khayorwui otsak sākhavai athumwui Vareli chihohaowa.

¹³ Athumna phungreibingwuitungli pha̱phayai, kala phungrārātungli shirimthing, thinglengthing, mathangthing pheili kachigat ot sai, kaja athumwui khaya̱ chi mathai. Chiwui vang nanao ngalāva̱bingna khayorva̱wui otsak sai, kala mākkhām kahaiva̱bingna phokaphā ot sai.

¹⁴ Nanao ngalāva̱bingna khayorwui otsak kasā tharan, kala mākhām kahaiva̱bingna phokaphā tharan athumli tandi mamimara; kaja mayarnao athum khalatta khayorva̱bingli ngasozatta lei, kala khayorbingli ngasoda pha̱kaphayā ot sai, kala theishingkakhui makhalei mibing shimānhaora.

¹⁵ Nana khayorwui ot sālala, O Israel, Judahli mayon ngasakalu. Gilgalli mazangalu, Beth-avenlila mavaalu, “Kharinga Prohowui ming singda kahāngna” da mamingzaialu.

¹⁶ Kapeowa simuk thāda Israel hi ngakaishitingtinga; khamashā seihomphungli yao homkapam thāda Prohona athumli phauirala?

¹⁷ Ephraim meoma̱li ngarumhaira, aningkhānranu.

¹⁸ Khamaripa kānglup, athum khalattana khayor sha̱naoli ngasopi; athumwui tekhamateipāle kakhayak otsakli leishimei.

¹⁹ Masina athumwui angachāngli romhaira, kala athumwui hanphutwui vang khayakhaora.