HOSEA 3 - Kathara Bible (BSI)

Hosea eina Ningmakatongva̱ Preiva̱

¹ Kala Prohona ili hānga, “Nana valuishitta shuikhangarui mi akhana leikashi phokaphava̱ akhali leishilu; chithāda Israelnaobingna vare kateibingli ngareivāhailala kala drakhātheikaowui khamuili kahaothui hailala Prohona leishichinga.”

² Chieina ina ali lupāsā shekel tharāda phangā, napai homer akha kala zam vaichumkha eina lokhui.

³ Kala ina ali hānga; “Na iwui sāda atam kasāngkha pamphalungra; nana khayorwui ot masāpaimara, lah khangatei mayarnaowui mangasāpaimara; chithāda sāda ila nawui sāra.”

⁴ Kaja Israelnaobingna awunga, lah wungnao mavaila, pha̱kaphayāla, tarung, ephod kala teraphimla maleila atam kasāngkha sompamra.

⁵ Naoda Israelnaobingna latungra kala athumwui Vare Proholi kala athumwui awunga Davidli phāra; kala athumna ngacheeda Proho kala awui kaphā chili khanaowa zimiksholi latungra.