HOSEA 14 - Kathara Bible (BSI)

Hoseana Israelli Kaphayet

¹ Latunglu, O Israel, Nawui Proho Vareli, kaja nawui khayonkhamāngwui vang na kongluihaira,

² Nawui tui khuiphunglaga Proholi latungda ali hānglu, “Khayon-khamāng khuithuiserhaolu, kaphā chi khuimilu, kala ithumwui morchaiwui athei che ithumna phungra.

³ Assyriana ithumli mahuimara, ithumna siguitungli matongmara kala pāng eina sākakhui chili ‘Ithumwui Vare’ maholuimara. Nawuili marānaobingna lukhamashan samphanga.”

Israelwui vang Mirin Kadhar Ngashitkhami

⁴ Athumwui mashitkasang chi ina raimira; ina athumli thāda leishira, kaja iwui malungkhavāt athumwui eina thuihaira.

⁵ Ina Israelwui vang ikra̱ kathā ngasāmira; ana timrāwon thāda wonrā, thingrong thāda angayung sa̱khuira;

⁶ awui ashon kasāngkha ngapānvāra; awui khamathā olive thāra, kala awui anganam Lebanonwui thāra.

⁷ Athumna latungda iwui khaya̱zingli pamra, athumna yāmgui thāda matekchimhaira; drakhārong thāda wonra, athumwui anganam Lebanonwui drakhāthei anganam thāra.

⁸ O Ephraim, meoma̱bingli ina khi sārakhala? nathumli ngahānkakaa kala yangkhame chi ina. Iya matekchim kahai cypressrong kathāna, nawui athei iwui eina kharāna.

Khangachang

⁹ Kachikathāna thangmeiakha, hi theishingkhuiranu; theithangkhama china hi theiranu; chiya Prohowui shongfa khamashungana; chili mashunwui mina zatra, kha chonkhamakānbing chi phei ngaphoka.