HOSEA 13 - Kathara Bible (BSI)

Israelwuitungli Khanaowa Bichar

¹ Ephraimna khamatui tharan mibingna kathirra; ali Israelwui alungli sochikatsai; kha ana Baalwui vang eina khayon sāhaida thihaowa.

² Kala ara athumna morei chungmeida sākhangai sai, athum khalattawui vang meoma̱ sākhui, themlak eina lupāsā eina meoma̱ sākhui, saikora chi them kathembingwui pāngotna. Hibingli pha̱phayālu da athumna hānga, mibingna seinaobingli maya̱ya.

³ Chiwui vang eina athum ngathorshongwui leichui kathā ngasāhaora, lah ngalāngda thengkahai ikra̱ kathā ngasāra, lanpumwui eina phanthui kahai lanji kathāna, kala charfawui meikhut kathāna.

⁴ Egypt ngaleiwui eina thuilaga nawui Vare Proho chi ina; nana I maningla Vare katei matheimana, kala ili lāngda huikhame maleimana.

⁵ Nali lamhāngli katheipa chi ina, kazing kakāng ngaleili katheipa chi ina;

⁶ kha athumna thoting eina zākahai tharan, thohaida lāngsohaowa; chiwui vang eina ili malai kahaina.

⁷ Chieina ina athumwui vang kazingkha̱ kathā ngasāra, ina kuirāng thāda shongfapheili rimpamra.

⁸ Anao tukthui kahaia singom thāda ina athumli yongrorra, ina athumwui mathik chikaophutmihaora, kala chitharan kazingkha̱ thāda ina athumli tukshaira, khararsāna athumli serkakazam thāda.

⁹ Ina nali sākhayāngra, O Israel; khipāna nali ngachonrakhala?

¹⁰ Nali huimi khavai nawui awunga kali lei; nali ngākmi khavai nathumwui wungnaobing kali lei; “Ili awunga kala wungnaobing milu” da nathumna pokakhuiabing chi?

¹¹ Malungvāt eina ina nathumli awunga mihaira, kala malungvāt eina athumli ina khuithuihaira.

¹² Ephraimwui khayonkhamāng chi khorhaira, awui morei kaziphaira.

¹³ Nao kapharāwui kachot chi awui vang ngasāra, kha a mathangkhama naomayara akhana; kaja arui akhalatta naopam khamorli maleimana.

¹⁴ Ina athumli Kathewui ramwui pangshapwui eina aman mida kankhuirala? Kathiwui eina ina ngatangkhuirala? O kathi, nawui singkakhareng kali leikhala? O Kathewui ram, nawui sākakhayang kali leikhala? Lukhamashan chi imikwui eina ngathumhaira.

¹⁵ Ana titi thāda mathāda phorlala, zimikshoshongwui masi, Prohowui masi chi, lamhāngwui eina phanrāra, kala awui tara̱pam thenghaora, awui ura̱wok chathaora; chili awui aman kasasaka sangkahai lanshim kānmiserhaora.

¹⁶ Samariana awui khayon chi phungra, kaja ana awui Vareli ngakaishihaira, athum raighaili pitāra, athumwui kateowabing ngaphitkazamhaora, kala naokhavaiya sha̱naobing rāmphutmihaora.