HOSEA 12 - Kathara Bible (BSI)

¹ Ephraimna masi homa, kala zingshoshongwui masili langpongda kharoma; athumna khangui kala khangashao chungsang ngasaka; athumna Assyriali ngasoda tongzā khavai sai, kala Egyptli thao khuivai.

² Prohona Judahwuitungli kaphen lei, kala Jacobli awui kasā athishurda tandi mira, kala ali sākahai athishurda athut khuira.

³ Naopamli leilakha ana amali pheimacha̱ yonkhui, kala mi kāshung kahai eina Vareli ngatuka.

⁴ Ana kazingraoli nganurda yuiya, ana chapta lukhamashan phai. Ana Vareli Bethelli samphanga kala chili Varena ali ngazeka.

⁵ Proho, saikorawui Vare, Proho kaji hi awui mingna:

⁶ Chieina nawui Varewui khangachon mangā eina latunglu, leikashili kala mashunli nganingtitlu, kala nawui Vareli mathāhailakla ngaraichinglu.

Latluida Bicharwui Tui

⁷ Pāngli makhamashung khān tamkhavai kasinga leih khayorana, kateikazāli akachang sai.

⁸ Ephraimna hānghaira, “Iya kashāngana, I khalattawui vang lan mathuisanghaira”; kha awui lan saikora china awui khayon sākahai chili mahāngshānrarmara.

⁹ Egypt ngaleiwui eina thuilaga I nawui Proho VAREna; Ina nali latluida kachonshimli pamngasakluishitra, retmi kahai phanit zimikshowui thāda.

¹⁰ Ina marānbingli ngazeka; khamahā mataisangkhame chi ina, kala marānbingwui mangā eina chānjam miya.

¹¹ Gileadli khayonkhamāng leiakha, athum makahatlākla khikha makhaninga ngasāra, Gilgalli athumna mukkā pha̱phayaakha, athumwui hanphut chila luiwui rashongli lungkhor khor kahai thahaora.

¹² (Jacobna Aram ngaleili yāmvai, chili Israelna preiva̱ akhawui vang otram ngatha, kala preiva̱ akhawui vang ana yao homa).

¹³ Marān akha eina Prohona Israelli Egyptwui eina khuishoka, kala marān akhawui eina phārihai.

¹⁴ Ephraimna kakhā ning retsangmihaira, chiwui vang eina awui Prohona asheewui khayon chi awuitungli haimihaora, kala awui khamashat ali latungluira.