HOSEA 11 - Kathara Bible (BSI)

Awui Ngakaikashe Yurli Varewui Leikashi

¹ Israelna angāngnao sālakha ina ali leishi, kala Egyptwui eina inaomayarali hokhui.

² Ina athumli chungmeida ho, athumna iwui eina tāmeimamānda yāma; athumna Baalli pha̱phayāpama, kala meoma̱li nganamkaphā riktāpama.

³ Chithālala Ephraimli zatthei khavai ina tamchithei, athumli ina iwui pāng eina vamkhuiya; kha ina raimi kaji athumna matheimana.

⁴ Ina athumli leikashi eina khalaprumlaga, lukhamashan khara eina shimanzat, kala ina athumwui khamorli hokkahai nārenra̱ chi ngacho ngasaka, kala ina hamzangda athumli phaui.

⁵ Athumna Egypt ngaleili latungra, kala Assyriana athumwui awunga sāra, kaja athumna iwuili malatungngaimana.

⁶ Raikhai eina athumwui keinung kaira, ngaveiwui mari kānmihaora, kala raipanwui alungli athumli shaiserhaora.

⁷ Iwui miyurna iwui eina yāmphalungra jihaowa, chiwui vang eina athumli kashai phungngasaka, kala khipānakha makhuitāmimara.

⁸ Kathāda ina nali chihohaipaira, O Ephraim! kathāda ina nali kateili horsangmipaira, O Israel! Kathāda ina nali Admah thāngasakpaira! Kathāda ina nali Zeboiimli kasā thāda sāpaira! Iningna chi mamayāmana, iwui lukhamashan mataisangmān kala nimamāna.

⁹ Ina iwui malungkakang chi marāza̱ ngasakmara, Ina Ephraimli masāshimānluimara; kaja I mikumo maningmana, Varena, nathumwui ngachaili Katharapa chi Ina; kala ina sākazam khavai marāmara.

¹⁰ Athumna Prohowui thi shurra, ana kazingkha̱ thāda khangangra; mha, ana khangangra, kala awui naobing kathirriri zimiktunshong eina ungra.

¹¹ Athumna vānao thāda kathirriri Egypt eina ungra, kala nāsha̱ thāda Assyria ngaleiwui eina ungra, kala ina athumwui shimli chihoungra, da Prohona hānga.

Israel kala Judahli Yonkashinam

¹² Ephraimna ili kakapik eina kuinamhaira, kala Israel shimkhurna kachipat eina, kha Judahli arui eina tangda Varena theimi, kala ana Katharali khayāshi.