HEBREWNAO 9 - Kathara Bible (BSI)

Tabernacle Khokharum

¹ Khare tuingashitli khokharumwui ain kala mikumona sākakhui khorum khavai apam leisai.

² Kachonshim akha sākhuilaga shokkhamayara kā chili Kathara Apam hoi. Chili meishong kala table eina ngasoda Ngasokhamiwui khamui hai.

³ Kā kakhane alungshong khalei chili Tharmathengmeikap kaje Apam hoi.

⁴ Chili nganamkaphā riktā khavai sināwui hanphutpam sinā eina kharoma tuingashit oko hai. Oko chiwui alungli manna sangkhavai sinakhong, lijeili awon khawon Aaronwui khāmshui, kala ningkhami kapisang kahai lungphek khani chila sanghai.

⁵ Okotung chili angachāng kakā sāyurna Vare khaleiwui mathun sāda, lukhamashanpam chiwuitungli angachāngna farorhai. Kha saikora chi arui mahāngrarmana.

⁶ Ot saikora ngarānserhailaga shokkhamayara kāli pāngmonbingna thangkachida zanglaga athumwui shiyansin singkai.

⁷ Kha Pāngmon Khareimāngna alungwui kā chili zanga, kala kumkhali akha shida zanga. Ana ashee khuiphungda awui vangla mibingwui vangla, matheimada morei sākahahai chiwui vang Vareli chigata.

⁸ Angayei-angayā saikora hi eina Manglā Katharana tharzā eina khare kachonshim leilakha eina tangda Tharmathengmeikap kaje Apamli zangkhavai mashomimana kaji chithei.

⁹ Hi ajawui atam hili theikhuipai khavaiwui vang kasāmaya. Hina kachitheiva Varivarali kachigat kala sā kapha̱ hina khokharumbingwui ning kāshungchao maji ngasakrarmana,

¹⁰ khiwui vangkhala kaja hiya ra̱shakshirei kala sākhamatharwui sharphahormānga. Varewui khangarān kadhar marāranglakha sāsā khavai akorwui ainzāmanga. Khamayonmāng kasāwui vang Varewui khangarān kadhara marāranglakha shichinkasā akorwui ainmānga.

Khristawui Ashee

¹¹ Kha hili khamathā ot leiping kahai chiwui vang Khristana Pāngmon Kharei sāda rāmihaira. Ana otram ngatha̱ khavai hakkhameia kala kāshung khameia shim chi mina sākakhui kachonshim maningmana, sākahai okathuiwui akai maningmana.

¹² Ithum saikorawui vang Tharmathengmeikap kaji Apamli Khristana akhashida kazang tharan, pha̱phayā khavai meshee, seishee, makhuizangmana, kha khalattawui ashee khuizangda katang makhavai ngatangkhami samphanga.

¹³ Meshee, seishee kala seinao rikkatāwui hotla chi ikrorlaga makathar athumli tharmisai.

¹⁴ Chithākha Khristawui ashee eina kayākha mataida tharmirakhala? Katang makhavai Manglā chieina chukkhara maleila a khalatta Vareli pha̱mi. Awui ashee eina ithumwui mashun-makhui chi makaphā otsakwui eina tharmihaida kharinga Vareli otram ngatha̱pai khavai sāmi.

¹⁵ Hiwui vang eina Khristana kadhara tuingashitwui ngashikmena. Varena ngashit kahai katang makhavai sokhami chi ana hokhui kahaibingli samphang ngasaka, kaja khare tuingashit chiwui eina ningkhān khavai thikhamina.

¹⁶ Hāngthi kahai leiakha kahānga mipā chi thihaira kaji shākhi leiphalungra.

¹⁷ Hāngkathi kaho hiya kahāngapā chi mathiranglakhava kānkhanā maleimana, kha thikahaiwui thili khuisangpai kajina.

¹⁸ Chiwui vang khare tuingashit chi ashee katā maleiakha kānkhanā maleimana.

¹⁹ Kharena, ainli kapi kahai ningkhami saikora chi Mosesna mi saikorali hāngchitheihailaga seishee eina meshee tara̱ manātlaga hungrisi kahai sāhā eina hyssop kaho thingnā chi khuilaga lairik eina mibing khaninili ikrorda

²⁰ hānga, “Hi nathumna mayon khavai Varena kaso kahai tuingashit chi mahor namkhami asheena.”

²¹ Chi tākam eina Mosesnala kachonshimlila kala khokharumli shikachina ot saikoralila ashee ikrorra;

²² kachangkhata ainwui athishurda ot saikora ashee eina tharmi ngasakpapama; kala ashee tākhami maningla morei mapheomipaimana.

Khristawui Pha̱kaphayāna Morei Pheokhami

²³ Kazingramli leiping kahai chiwui amahā namkakhuibing chiya chithada sāmathākhui phalungra. Kha kazingramwui otchao kajibing chiya hili lāngkhamei phākhamei pha̱kaphayā darkar sai.

²⁴ Kaja akachangwui amahā kasā mikumona sākakhui Kathara Pam chili Khrista mazangmana, kha kazingramli zangda Varewui mangāli ithumwui vang nganingmida lei.

²⁵ Jehudiwui Pāngmon Khareina ashee eina ngasoda kum kachida Tharmathengmeikap kaji Apamli zanga, kha Khristava akhali lāngda pha̱phayā khavai mazangmana.

²⁶ Chi maningsāsi kaja okathui kasāwui eina thuida pha̱phayāchingmara. Kha khangachang atam rānanai morei khāngthuimi khavai saikorawui vang akhashida a khalatta thikhamina.

²⁷ Mi saikora akhashida thiphalungra.

²⁸ Chiwui eina kachungkhawui morei pheomi khavai Khristali akhashida pha̱kaphayāna. Moreili bichar sākhavai maningla kha ali khangaraibingli huikhui khavai kakhane sāda rāluira.