HEBREWNAO 8 - Kathara Bible (BSI)

Jishu, Ithumwui Pāngmon Khareia

¹ Hāngkahai saikorawui tuira̱ chi hina; ithumwui Pāngmon Kharei hikathā lei kaja, ana kazingramli Khangamkharei wungpam yāshong pamda lei.

² Kala mina maningla Prohona sākahai shim akachang chiwui Tharmathengmeikap kaji pamli, Pāngmon Kharei sāda otram ngatha̱mida lei.

³ Pāngmon Kharei kachiva̱ hi Vareli kachigat kala pha̱kaphayāwui ot sākhavai kapangkasangna. Chithada sāda ithumwui Pāngmon Khareipāla khikhakha chigatphalungra.

⁴ A okathuili leisi kaje kachilikha pāngmon masālakmara, kaja ot kasā pāngmon kachungkha lei.

⁵ Athumna kasā hiya kazingramli sāda khalei ot chiwui aka̱la kathā sha̱kakhuina. Hi Mosesna sākasā chieina tākamhai. Ana Tabernacle sauki kaji tharan Varena ali hānga, “Kaphungtungli hāngkahai chi tākam eina mangapeilakla sālu.”

⁶ Vare eina mikumowui ngachaili phākhameia tuingashit ain ngarānkhamiwui vang, hakkhameiya pāngmonwui ot chi Khristali mihaira, kaja phākhameiya ngashikkhami ana sakāmi.

⁷ Khare tuingashit chili khayon maleisāsi kaje, kakhane darkar masāmara.

⁸ Kha Varena mibingwui khayon samphanghaoda hānga, “Zimiksho chi rārāli da Prohona hānga; kaja, Israelnao eina Judahnaoli kadhara tuingashit akha sāra.

⁹ Awo-ayibingli Egypt ngaleiwui eina ina thara̱kashok tharan khangashit chithada masāluimara. Ina athumli tuingashit kasā chili athumna maningtongmana, chiwui vang inala mayangkhamina da Prohona hānga.

¹⁰ Ina Israelnaobingli tuingashit sāki kaji chi hina da Prohona hānga: Rārāda khalei atamle ina iwui ainbing hi athumwui ningli sangmira, kala athumwui wuklungli kapisangmira. I athumwui Vare sāra, athum iwui mi sāra.

¹¹ Akha eina akha tamchithei ngarokta awui khongnainaobinglila, achinā ngarālila, ‘Proholi theilu’ da mahāngmara. Kaja athum saikorana ili theira, teomeikap kaje eina thuida reimeikap kaje kāshungda.

¹² Athumwui khayon pheomira, athumwui moreila maphaningungmiluimara.”

¹³ Kadhara tuingashit khalei china khare chi chamngasakhaowa, kala kasāngkhahaida chamkahai ot chi thākta shimānhaowa.