HEBREWNAO 7 - Kathara Bible (BSI)

Melchizedek Pāngmon

¹ Melchizedek, Salemwui awunga, kala Reimataimeikap kaje Varewui pāngmon china Abrahamna raili vāda awungabingli sāthathailaga hankhaung tharan angarokta somi,

² kala Abrahamna awui khalei saikorawui sharuk tharāwui akha ali mi. (Melchizedek kajiwui kakhalat khareva, “Khamashung khangarongwui Awunga” kajina; a Salemwui awunga ngasā kahaiwui vang awui ming “Chingri kahai Awunga” dala khalatpai).

³ Melchizedekwui ava̱ avā, awo-ayi lei kaji khikha makapihaimana, kala awui kapharā eina kathila kapi kahai maleimana. A Varewui Naomayara kathāna kala katang mavaila pāngmon akha sāda leichinga.

⁴ Chithākha a kayākha kahaka mikhala? Awo kharar Abrahamnala raili samkaphang sharuk tharāwui akha mi.

⁵ Kala Leviwui ara̱-azā pāngmonbingli Israelnaobingwui eina sharuk tharāwui akha ngashaikhui khavai ainna kasohai, chiya Abrahamwui ara̱-azā ngasesenglala aramnaowui eina ngashaikhui.

⁶ Melchizedek Leviwui shangnao maningmana, kha Varewui ngashit kahai samkaphanga Abrahamwui eina sharuk tharāwui akha khuida somi;

⁷ sokhami khamena sokhami kakhuiali reimei kaji hili ningmaong khavai maleimana.

⁸ Kathara Lairikli kahāng thada, pāngmonbingwui shong jiakha thikapai mina sharuk tharāwui akha chi ngashaikhui, Melchizedekwuishongva kharinga china ngashaikhui.

⁹ Hānglaksa jiakha, Abrahamna katharā chi khami tharan, Levinala (sharuk katharā khangashaiya ara̱-azā) miya.

¹⁰ Abraham eina Melchizedek samkaphang tharan Levi mapharārangsai, wuklungli leikasā kathāna.

¹¹ Leviwui pāngmonsin eina kākashung chi khuirāshapa jiakha (Kaja mibingna ain hi chiwui eina samkaphangna jihaoda), khisāda Aaronli ngarikathi pāngmon maningla Melchizedek kathā pāngmon khangatei shokkhangasakkhala?

¹² Pāngmon ngacheiakha ainla ngacheiphalungra.

¹³ Hiwui pongli ithumwui Prohova shang khangateina, ashi shangwui eina khipānakha pāngmon sāda otram mangatha̱mana.

¹⁴ Ali Judah shimkhurli pharai kaji tharlak eina theikahaina; kala pāngmonwui pongli Mosesna khamatui tharan shang hiwui pongli khikha mahāngmana.

Melchizedek Kathā Khangatei Pāngmon

¹⁵ Hi Melchizedek kathā khangatei pāngmon akha shokhaira kaji hina tharmeikharda theingasaka.

¹⁶ Ali mikumowui ayin eina pāngmon sākhangasak maningmana, kha katang makhavai kharing chiwui pangshap eina pāngmon sākhangasakna.

¹⁷ Kathara Lairikli hithada hānga, “Melchizedek thada nana katang mavaila pāngmon sāra.”

¹⁸ Kachama ain chi ngazanhaoda kala makannāthuda horhaowa.

¹⁹ Kaja Moseswui ainna khilikhala makāshung ngasakrarmana. Ara phākhamei kachihān ithumli chitheimihaira. Chiwui mangā eina ithumna Vareli nganaimeihaira.

²⁰ Hili tuingashit makazang maningmana.

²¹ Rida pāngmon otsin kasingbingna tuingashit makhuila pāngmon sāsai, hipā hiva tuingashit zangda pāngmon ngapham khui; kaja Varena hithada hānga: “Prohona khangashit sāhaira, awui ning mangacheiluimara; mashimānda nana pāngmon sāra”

²² Khani hiwui khangatei athishurda Jishuna phākhamei ngashit kahaiwui nganingkhamena.

²³ Ngatei khangarok akhala lei; athumwui pāngmon kachungkhaya, kaja kathi kaho hi ngavāhaoda, ngapham hi mathila singpamshon majipaithuwa.

²⁴ Kha Jishuva ringchingda lei, chieina khangatei pāngmonli mikhamaron maleimana.

²⁵ Chiwui vang awui ming eina Vareli kazanga saikorali aruila kala atam kachida ana huimishapa. Khikhalajila ana athumwui vang Vareli phayetmichinga.

²⁶ Chiwui vang eina ithumwui ningkachāng ungshung khavai pāngmon kharei chi Jishuna. A Katharana; ali khayon kala morei maleimana; morei kaphungbingwui eina ngateimihaida kazingramli chuimeida khuikāhaira.

²⁷ Ava khangatei pāngmon khareibing kathā maningmana, ana rimeikapta awui moreiwui vang, chiwui thili kateibingwui moreiwui vang da thangkachida pha̱phayā khavai darkar masāluimana, a khalatta pha̱phayā khavai kachigat tharan, pha̱kha kashi china saikorawui vang pha̱mi kahaina.

²⁸ Makaphayo mikumoli ainna pāngmon kharei sāngasaka, kha ainwui thili kharā Varewui ngashit kahai tui china katang mavaila kāshungchao ngasak kahai Anaomayarali kapangsanga.