HEBREWNAO 4 - Kathara Bible (BSI)

¹ Ara, Varewui ngasāmkakhui chili zangkhavai ana ithumli ngashitkhami chi mida lei. Chiwui vang eina khipākha ngasāmkakhui chili mazangkharar malei khavai ning ngasharra.

² Kaja athumna kashā thada ithumla paokaphā chi shāhaira, shālala athumwui vang kānkhanā maleimana. Khiwui vangkhala kaja athumna kashā tharan shitkasang eina ngasoda makhuisangthuwa.

³ Hithada hāngkahai thada ana ngashitmi kahai ngasāmkakhui chi ali shitkasanga ithumna samphanghaira. Ana okathui sāda kupkahaiwui thili hithada hānga. “Lungvāt eina ina khangashit sai; ‘Iwui ngasāmkakhui chili athum khipākha mazanglakmara,’” chitharan ana sāki kaji saikora apuk-apaga kasā atamli kuphairasai.

⁴ Kashinethangwui pongli kathara lairik apam akhali hithada hānghai, “Ot saikora kupserhaida kashinethang Varena ngasāmkhui”,

⁵ ngaraikachā apamli hithada hāngluishita, “Iwui ngasāmkakhui chili athum khipākha mazanglakmara.”

⁶ Paokaphā shākharebing chi ngasāmkakhui masamphangmana, kachiwui vangkhala jilaga athumna mashitsangthuwa. Kha kaikhana ngasāmkakhui samphangra.

⁷ Kaja Varena khangatei zimiksho akha phākhuida “Aja” kaji hi eina theikhui. Tui hi zingkum kasāngkhawui thili Davidwui eina kashā samphanga, kaja kathara lairikli hithada hānghai; “Aja nathumna Varewui khon shaakha, wuk mamakanghaialu.”

⁸ Varena ngashitmi kahai ngasāmkakhui chi Jishuna mibingli mihaisāsi kaja khangatei zimiksho akhawui pongli Varena mamatuihaisāmara.

⁹ Chiwui vang eina aruila, Varena sabbaththang ngasāmkakhui thada awui mibingla ngasāmkhui khavai lei.

¹⁰ Varena awui ot sālaga ngasāmkakhui thada, ali kazangbingla kachichāwui ot kasāwui eina ngasāmkhuira.

¹¹ Chiwui vang eina ngasāmkakhui chi samphang khavai ithum kashap eina tangda sāsa, chithākha shitkasang khavātwui vang athumna masamkaphang chithada ithum khipākha masamkaphang maleimara.

¹² Varewui tui hiya kharinga kala pangshapana. Zankhangasung raighaili zanmei. Hiya kharing eina manglā ngashik khavai pam, kala ara̱-ngasun eina angating ngachaipam kachida vāza̱sera. Miwui ningkachāng kala kaphaningla hina kashikaphā chitheimi.

¹³ Varivarawui eina ngathumkapai khikha maleimana. Ot saikora awui miktāli ngakheikhang eina theisera; kala ithumna sākahai ot saikora ali hāngphatserki kajina.

Khareia Pāngmon Jishu

¹⁴ Jishu, Varewui Naomayara pāngmon kharei kazingramli vāhaira, chiwui vang eina ithumna khuisang kahai shitkasang chi singtitsa.

¹⁵ Ava ithumwui khangazanli malukhamashana pāngmon kharei maningmana. Lākhashong phaningakha, ithumwui thada alila suihaira, kha ava morei masālakmana.

¹⁶ Chiwui vang eina lukhamashan khaleipam Varewui wungpamkhongli chihansa̱ vāsa. Chili ithum lukhamashan samphangra kala ithumna khavāt tharan ngachonmi khavai lukhamashan samphangra.