HEBREWNAO 2 - Kathara Bible (BSI)

Hakkhamahā Huikhami

¹ Chiwui vang eina ithumna shākahai khamashung chi ngazipmeida singphalungra, chithākha ithum chiwui eina mangaphongthuimara.

² Kazingraona khami pao chi khamashungna da chitheimihaira; chithākha chiwui athi makashurbingna samphang khangayi tandi chi samphangra.

³ Hiyākha kahaka huikhami hili ithumna manganāsangla kathada yāmshokpairakhala? Khareli Prohona huikhami hi hāngmi. Kala kashābingna chi mashunga da shākhi mihaira.

⁴ Varena machutbing, matakhak kahai kala mina masākharar otsakbing kala awui ningkachāng athishurda ngayarkhami Manglā Katharawui lemmet chieina shākhi mi.

Huikhamili Thānvākhame

⁵ Ithumna matuida khalei rāki kaji okathui hi kazingraobingna mungkhavai mamihaimana.

⁶ Kha kathara Varetuili hāngkahai thada, “Mikumo hi khida, nana awui vang hiyākha phaningmi, khikha makhaning mikumo hili nana hiyākha sakta khuimikhala?

⁷ Atam kasha̱khawui vang nana ali kazingraobingli kateokha nemmeida sākhui, tekhamatei kala khayākakā eina kuihon sāda ngahonmi.

⁸ Kala ot saikora awui pheizingli leingasaka.” Ot saikora awui pheizingli leingasakta ot saikora awui pāngli horsangmi, mahorsangkhami akhala maleimana. Chithālala arui eina tangda ot saikora awui pheizingli leihaira kaji ithumna matheiranga.

⁹ Kha Varewui lukhamashan mangā eina mi kachiva̱wui vang thimiki kaje atam kasha̱khawui vang kazingraoli nemmeida sākahai Jishuli ithumna thei. Kathiwui kachotkachāng phungkhamiwui vang tekhamatei kala khayākakā eina kuihon sāda ngahonmi kahai chi ithumwui mik eina thei.

¹⁰ Ot saikora kasā kala phāri khavai Varena mi kachungkhali Anaomayarawui tekhamatei chi samphangrum khavai mingasakphalungra kaji hi mashunglaka.

¹¹ Kaja tharkhame eina tharmi kahaibing saikorawui haophok khavaipam akhamānga. Chiwui vang eina Jishuna athumli ichināngarā hokida makhayakmada

¹² hithada hānga, “Ina nawui ming ichinā ngarāli vaomalānra, yarui kazipli nali ina masot chikatra.”

¹³ Hithada hānglui, “Ina ali chihānchaora.” kala hithada hānglui. “Ila, Varena mikahai naongarābingla hili lei.”

¹⁴ Chieina naoshinaobing chi phasā khavaia kala ashee kazanga mi sāhaoda Jishula athum thāpapama. Kaja ana thikhami mangā eina kathiwui pangshap kasinga chipee chili shimān ngasaka.

¹⁵ Kala kathili khangacheewui vang eina athum mirin peida rao sākasābingli ningkhān ngasaka.

¹⁶ Kaja ana khangachon chi kazingraobingli maningla Abrahamwui ara̱-azālina kaji hi khamashung tuina.

¹⁷ Ningtongda shitsangkapai kala Varewui mangāli lumashankatha pāngmon kharei sākhavai; ana otsak kachiva̱li achināngarā thada kasāna, kaja mibingwui morei pheomi khavaina.

¹⁸ Alila suida kakhanang samphang kahaiwui vang, ara kasui samphangda khaleibing chili ana ngachonmira.