HEBREWNAO 13 - Kathara Bible (BSI)

Kathada Vareli Ningyāng Ungngasakra

¹ Chinaongarāwui leishāt nathumwuili leingasakchinglu.

² Kha̱mi-mā ngahān kathei eina kaikhana matheila kazingraoli zunkhui ngasakhaira.

³ Phātop kazangbingli nathumla zangkharum thada phaninglu. Kakhanangbingli nathumla khanangkharum thada phaninglu.

⁴ Shakazā ot hi khayākakā otna, shakazā pet mamakhao ngasakalu. Varena khamathang-khamarangbingli kala phokaphābingli bichar sāra.

⁵ Nawui khalei chi shapa da phaninglu, lupāli mangamaralu, kaja Varena, “Ina nali mahorhailakmara kala machihohailakmara” da hānghaira.

⁶ Chiwui vang eina pingmeida ithumna hāngsa. “Proho, iwui ngachonkhamena, ina mangacheemara; mina ili khi sathukrakhala?”

⁷ Varewui tui hāngkhame nathumwui kathānabingli phaningunglu. Athumna kathada ringsā, kathada thi kaji phaningungda athumwui shitkasang sha̱khuilu.

⁸ Jishu Khrista ayāla, ajala kala katang mavaila chichinga.

⁹ Ngateihahang kahai tamkachithei china nathumli mangui ngasakalu. Varewui lukhamashan eina ithumwui manglā pangkhangasak phālaka, kha kashakazā khangalang eina maningmana. Hikatha ain khamayonabingli china khikha ngachonkhami maleimana.

¹⁰ Ithumwui hanphut akha lei, chili pha̱kaphayā chi kachonshimli otram khangatha̱bingna mashaipaimana.

¹¹ Jehudiwui pāngmon kharei china moreiwui vang pha̱kaphayā sāda ashee chi chigat khavai Tharmathengmeikap kaje Apamli khuizanga. Kha asāva so ayarli riktai.

¹² Chithada sāda Jishunala awui ashee eina mibingwui morei tharmi khavai keinungwui ayarli thimi.

¹³ Chiwui vang eina ithumla keinungwui ayarli vāda awui kakhayak chi phungrumsa.

¹⁴ Okathuili ithumwui rungshinga keinung maleimana, kha rāki kaji keinung chiwui vang khangaraina.

¹⁵ Jishuwui mangā eina ithumwui pha̱kaphayā sāda Vareli atam kachida masotchikatsa; hi ithumwui khamor eina a Prohona da hāngkaphatwui kachigatna.

¹⁶ Akha eina akha kaphā sāda ngachon khangarok mamalaialu, hikathā hi Vareli ningyāng ungkhangasaka pha̱kaphayāna.

¹⁷ Kathānabingwui kahāng nganāda athumwui thi shurlu. Athumwui otsak Vareli chitheiki jihaoda khangasām maleila athumna nathumwui manglāli yangmichingra. Nathumna kahāng nganaakha, athumna athumwui ot chi mathānthathup sāra, chi maningakha, athumna kakhanang eina sāra, chi nathumwui vang khikha kānkhanā maleimana.

¹⁸ Ithumwui vang seihā sāmichinglu. Ithumwui mashun tharlak eina lei da thei, khikhalajila ithumna atam kachida khamashung otmāng sāngai.

¹⁹ Kala nathumli thākta rāsamphang khavai iwui vang matailak eina seihā sāmilu.

Khangachang Seihā

²⁰ Ara, yaobingwui kahaka yaokahoma ithumwui Proho Jishuli ringshoklui khangasaka Varewui chingri kahai, katang makhavai tuingashitwui ashee mangā eina,

²¹ awui kaphaning sākhavai Varena kaphā chi ngarumsangmida, Khristawui mangā eina awui ningyāng ungkhavai ithumwui eina shokranu. Khristali mashimānda tekmateichingranu. Amen.

Khanao Tui

²² Ivānaobing, kasatkasang tui hili ningsangda khanganāmilu, ina chithi hi sha̱lak eina kagapina.

²³ Ivānao Timothy phātopwui eina shokhaira kaji nathumlila theingasakngaiya. Ana thākta raakha, ina nathumwuili kharā tharan ini ngasorāra.

²⁴ Kathānabing kala Varewui mibing saikorali ithumwui shālam hāngmilu. Italyli khalei avānaobingna nathumli shālam mili.

²⁵ Varewui lukhamashan nathum saikorali ngasomichingrānu. Amen.