HĀSHOKME 9 - Kathara Bible (BSI)

¹ Khangarongala, thangkhamala kala athumwui otsak saikora Varewui pāngli kathāda leikhala da iningli khaluizālaga thei, kaja leikashila, yangkakharingla mina matheirarmana. Athumwui mangāli khalei saikora aremana.

² Khamashungali ranu, katharali ranu, makatharali ranu, ali pha̱kaphayāli ranu, ali mapha̱kaphayāli ranu, makaphāli ranu, kaphā mila morei kaphungawui thāda kala khangashit kasā mila makasaawui thāda saikorawui angasut akhamanga.

³ Miwui ningli makaphāna pemtinghailala, kala athumna ringlakha kapā kaho chi athumwui wuklungli leisālala, atam khaung tharān thisera kaji hi okathuili kalākashi akhana.

⁴ Kha kharinga saikorali khangashika chiya kachihān lei, kaja thikahaia kazingkha̱li kharinga fana phamei.

⁵ Kaja kharingbingna athum thira da thei, kha kathena khikha matheimana, kala athumwui sāman maleiluimana; athumli phaningkhaungla maleiluimana.

⁶ Athumwui leikashi, athumwui yangkakharing kala athumwui yuikashi saikora shimānhaira, kala okathuili sāda khalei chili athumwui yar maleiluimana.

⁷ Vāda, ningyangunglak eina aphāshak aphāzālu; kaja nana kasāsā chi Varena mayāmi kahaina.

⁸ Nawui kashankachon charching ngasaklu; nakuili kuithao mavāt ngasakalu.

⁹ Okathuili mikahai nawui makankhanā mirin hili nana leikashi napreiva̱li ngasoda mirin ringphākhuilu, khikhalajila okathuili ngalangzārda ringkhavai nali yarkahaina.

¹⁰ Nawui pāngna sākhavai khalei kachiva̱ nawui yāng eina sālu; kaja nana vāki kajipam Kathewui ram chili ot kasāla, chukhamajala, theithangkhameila, aworla maleimana.

¹¹ Kala ina theiluiya kaja okathuili shongzā khangakhuili kathaknala maningmana, railila kapangnala maningmana, thangkhameimāngnala mazāmana, ningkazanmāngnala mashāngmana, kathemāngli lumkakā maningmana; kha saikorali atam athishurda kashoksera.

¹² Kaja mina awui atam matheimana. Khailenli khai mankahai thāda, kala khalenli vānao mankahai thāda, kalākashi atam kashuirak eina mibingli kharā tharan khalenli manhaowa.

Thangkhamei eina Mangkhama̱

¹³ Okathuili thangkhameiwui machutkhui khavaila ina kathei samphanghaira, kala hi iwui vang hakmahālaka.

¹⁴ Mi kateokhamāng okkathui keinungnao akha leisai; kala kahaka awunga akhana rangapaikhuilaga raipan sakchangda ngaveiya.

¹⁵ Kha chili kachāma thangkhameia mi akha leisai; kala ana awui thangkhamei eina keinung chi kankhui. Chithālala mi khipānakha kachāma mi chili maphaningungmana.

¹⁶ Kha ina kahāng hina kaja, kachāma chiwui thangkhameili chipatsālala kala awui tuili mahengsangsālala thangkhameina pangshapli phāmei.

¹⁷ Mangkhama̱bingwui alungli khamungana khavaopale thangkhamawui khon kasainakha kahāng nganākakhuina phamei.

¹⁸ Thangkhamei hi raiwui khutlailila phāmei, kha morei kaphunga akhana kaphā kachungkha sashimānshapa.