HĀSHOKME 5 - Kathara Bible (BSI)

Khangashit Masāphāphālu

¹ Nana Varewui shimli khavā tharan nawui pheikār yangkazaklu; mangkhama̱bingwui pha̱kaphayā kachigatle nganaida anganākakhuina phamei; kaja athumna makaphā kasāna da athum matheimana.

² Nakhamor mathāknālu, kala Varewui mangāli tui hāngkida malung makatungnālu, kaja Vareva kazingramli lei, nava okathuili khaleina; chieina nawui tui teomeikhamaranu.

³ Kaja kachungkha machukakha mangsa̱ya, kha mangkhama̱na tui kachungkha matuiya.

⁴ Nana Vareli tuingashit kasā tharan, chi khamili mahuinganongalu; kaja ana mangkhama̱bingli ningyāngkhaung maleimana. Nana ngashit kahai chi milu.

⁵ Khangashit sāhailaga makhamile khangashit makasāna phamei.

⁶ Nakhamorna nali morei masā ngasakalu; kala paomewui mangāli chi khayonna da mahāngalu; khisāda Varena nawui tuili malungvātta nawui pāngsak sāshimānmirakhala?

⁷ Kaja mang chungmei tuipai chungmei: kha nava Varivarali ngacheelu.

Mirin Aremana

⁸ Ngalei akhali kachāmali rekharekta mashun bichar kala khamashung chipatta khuithui kahai theiakha, chikathā otsakli matakhak kahai masaalu; kaja kajui otvali juikhameiya akhana yangdalei, kala athumwuitungli juikhamei leiluishita.

⁹ Ngaleiwui kānkhanā chiya mi katongawui vāngna; awungala vāsang kahai ngalei chiwui eina katong samphanga.

¹⁰ Pheisāli leikashe mi che pheisā eina ningyang maungrarmara; lanli leikashe mi chila chipapama, hila aremana.

¹¹ Kashakazā mataikasang tharan kazā mila mataisanga; chieina akhavāwui vanga mik eina theikakhuili lāngda khi kānkhana leikhala?

¹² Teoda zālala, chungda zālala ot kasā mi che piphuphai; kha kashānga chiya awui sorkhangasai lan china mapivāpaimana.

¹³ Okathuili zakshilak kahai makaphā akha ina thei; chiya lan khangavā china a khalatta kalāshi khavai kaziphai,

¹⁴ kala lanbing chi makaphā leihsak akhali ashimanserhaowa; nao mayarnao akha pharālala awui pāngli khikha maleithuwa.

¹⁵ Ava̱va̱wui naopam eina kashok takam eina ana thuiluihaora, asāmsai eina kharā thāda, ana mathuisang kahai akhala apāngli singthui khavai maleimana.

¹⁶ Hila zakshikhailak kahai makaphā akhana: ana kharā tākam eina zatthuipapamra; khamasaiwui vang ngalang zarda khi kannara,

¹⁷ awui mirin peida wukakhanang eina tangkhamanglungli okthuida, ningyāng maunglakla, kazāt khāngda, malungvātchir eina pamrala?

¹⁸ Yanglu, okathuili Varena mikahai athishurda mirinli shukshuk sāda kachichāna mathuisang kahai chi phāshak phazālaga ringphākakhui chi kaphā kala sākhangayi ot akhana da ina thei, kaja chi awui yarna.

¹⁹ Mi kachiva̱li Varena khami khalalei lan saikora kala chi shichin khavai kala kachichāwui yar mayākhuida awui mathuisang kahai chieina ringphākhui khavai kashap mihaira— hi Varewui lemmetna.

²⁰ Kaja awui mirinwui zimikshobing chi chiyākha maphaningungmara, kaja Varena awui wuklungli khamathānna pemngasakhaira. 8