HĀSHOKME 3 - Kathara Bible (BSI)

Ot Kachiva̱wui Atam

¹ Ot kachiva̱wui vang zur-kān ngavai, okathuili khalei ot kachiva̱wui vang atam lei:

² kapharā atam lei, kala kathi atam lei; lingkasang atam lei, kala lingsang kahai chi phurkashok atam lei;

³ shaokathat atam lei, kala raikhami atam lei; sakakhayāng atam lei, kala sakakā atam lei;

⁴ sikafa atam lei, kala khamana̱ atam lei; chapkhangachā atam lei, kala pheichak kasā atam lei;

⁵ ngalung horkahai atam lei, kala ngalung ngamuikakhui atam lei; ngavamkakhui atam lei, kala khamahei atam lei;

⁶ kaphā atam lei, kala kashimān atam lei; phākhari atam lei, kala horkahai atam lei;

⁷ serkakhāk atam lei, kala khopkakhui atam lei; kasaikha kapam atam lei, kala khamatui atam lei;

⁸ leikashi atam lei, kala yangkakharing atam lei; raikasa atam lei, kala chingri kahai atam lei.

⁹ Ot kasaa china awui ngalangkazārwui eina khi tongzākhala?

¹⁰ Varena miwui naomayara ngarāli ngalang zārkhavai mikahai ot chi ina theihaira.

¹¹ Ana ot kachiva̱ kachichāwui atamli mathāsek eina sāhai; kala mikumowui ninglila ana katang makhavai sangmi; kha chithālala Varena haokaphok eina thuilaga katang eina tangda khi sahaikhala kaji maphāshokrar khavai sāmihai.

¹² Athum ringda leilakha ringphākakhui, kala mathānkakhui chili lāngda athumwui vang phākhamei khikha maleimana da ina thei;

¹³ kala mi kachiva̱ phāshak phazālaga ringkaphā, ot sālaga ningyāngkhaung hi Varewui lemmetna da thei.

¹⁴ Varena kasāsā ayāyāva̱ leichinga kaji ina thei; chili khikhala mangarumsangpaimana, kakhuila makhuishokpaimana; mikumona ali ngachee khavai Varena hithāda sākahaina.

¹⁵ Khalei chi rida leihairakasāna, shokki kaji chi rida shokkahaina, kala thuikahai chi Varena phādalei.

Okathuili Mashun Makhalei

¹⁶ Chili lāngda okathuili ina thei kaja mashun bichar pamlila makaphā makhayā lei, kala khamashung khangarongwui pamlila makaphā makhayā lei.

¹⁷ Ina ningli phaninga, Varena khamashungalila, makhayaalila bichar sāra; kaja ana ot kachiva̱ kala otsak kachiva̱wui vang atam akha rethaira.

¹⁸ Mikumowui naomayarabingwui pongli ina iningli phaninga, kaja Varena athum hila sāyurna da theikhavai chāng khayangna.

¹⁹ Kaja mikumowui angasut eina sābingwui asut ngaraichai; akhana kathi thāda akhapāla thipapama. Athum saikora khaksui ngaraichai, kala mina sābingli mataikhamei maleimana; kaja saikora aremana.

²⁰ Saikora apam akhali vai; saikora chifawui einana, kala saikora chifali latungluira.

²¹ Miwui manglāna atungshong kai, kala sāwui manglāna ngalei zingshong zanga kaji khipāna theikhala?

²² Chiwui vang eina mina awui ot sāda ringkaphāli lāngda khikha maleimana kaji ina thei, kaja chi awui yarna; awui thili sāshokki kaji chi khipāna ali chitheishapkhala?